استانادا ءسابيدىڭ ۇستىنە قايناپ تۇرعان شاينەك قۇلاپ كەتتى

فوتو: Facebook / اكمارال النازاروۆا

استانا دارىگەرلەرى جۇرەگى 10 مينۋت سوقپاي قالعان 6 ايلىق ءسابيدى امان الىپ قالدى, دەپ حابارلايدى qandastar.kz اقپارات پورتالى كتك تەلەارناسىنا سىلتەمە جاساپ. 

استانا دارىگەرلەرى جۇرەگى 10 مينۋت بويى توقتاپ قالعان التى ايلىق ءسابيدى قايتا ومىرگە اكەلدى. كلينيكالىق ءولىم جەدەل جاردەممەن رەانيماتسيا بولىمىنە جەتكىزۋ كەزىندە, دەنەسىن كۇيىك شالعاننان كەيىنگى اۋىرسىنۋ شوگىنىڭ سالدارىنان ورىن الدى.

نارەستەنىڭ اناسى ناتاليا شلىكوۆا بىلاي دەيدى:

– ول جۇرۋگە ارنالعان قولاربادا وتىرعان ەدى, مەنىڭ قاسىمدا اسۇيدە بولدى. ءبىر ساتكە عانا كوزىمدى باسقا جاققا بۇرىپ ەدىم, قايناپ تۇرعان شاينەك اۋدارىلىپ, تۋرا ۇستىنە توگىلدى. سول كەزدە ونىڭ كەۋدە قۋىسى كۇيىپ, قاتتى شوك الدى. ءبىز ءبىر اپتا بويى جانساقتاۋ بولىمىندە جاتتىق. سەگىزىنشى كۇنى وزدىگىنەن دەم الا باستادى, تاماق ءىشتى. دارىگەرلەر بالاما ەكىنشى ءومىر سىيلادى.

رەانيماتولوگتاردىڭ ايتۋىنشا, جۇرەك توقتاعاننان كەيىن ونى قايتا ىسكە قوسۋ تەك 4-5 مينۋت ىشىندە مۇمكىن بولادى. بىراق بۇل جاعدايدا 10 مينۋت وتكەن سوڭ ءسابيدىڭ جۇرەگى قايتا سوعا باستادى. دەگەنمەن, بىرنەشە كۇن بويى ونىڭ ءومىرى قىل ۇستىندە تۇردى – ول جاساندى تىنىس الۋ اپپاراتىنا قوسىلىپ, كۇيىككە قارسى تەراپيا الدى. وقيعا سالدارىنان بالانىڭ دەنەسىنىڭ 25%-ى قايناعان سۋمەن كۇيىپ قالعان.

قازىر سابيگە ەشقانداي قاۋىپ جوق, ول ساۋىعىپ كەلەدى.

نۇرسۇلتان قۇربانبەكوۆ, №2 كوپسالالى بالالار اۋرۋحاناسىنىڭ انەستەزيولوگيا, رەانيماتسيا جانە قارقىندى تەراپيا ءبولىمىنىڭ مەڭگەرۋشىسى:

– ءبىز جۇرەك قىزمەتى توقتاعان جاعدايدا قولدانىلاتىن ادرەناليندى تىكەلەي جۇرەككە ەنگىزۋگە ءماجبۇر بولدىق. العاشقى ءۇش تاۋلىكتە جۇرەك قىزمەتىنىڭ توقتاۋىنا بايلانىستى جاعدايى تۇراقسىز بولدى. بۇل – وتە سيرەك كەزدەسەتىن, بىرەگەي جاعداي.