Astanada sábıdiń ústine qaınap turǵan sháınek qulap ketti

Foto: Facebook / Akmaral Alnazarova

Astana dárigerleri júregi 10 mınýt soqpaı qalǵan 6 aılyq sábıdi aman alyp qaldy, dep habarlaıdy qandastar.kz aqparat portaly KTK telearnasyna silteme jasap. 

Astana dárigerleri júregi 10 mınýt boıy toqtap qalǵan alty aılyq sábıdi qaıta ómirge ákeldi. Klınıkalyq ólim jedel járdemmen reanımaııa bólimine jetkizý kezinde, denesin kúıik shalǵannan keıingi aýyrsyný shogynyń saldarynan oryn aldy.

Náresteniń anasy Natalıa Shlykova bylaı deıdi:

– Ol júrýge arnalǵan qolarbada otyrǵan edi, meniń qasymda asúıde boldy. Bir sátke ǵana kózimdi basqa jaqqa buryp edim, qaınap turǵan sháınek aýdarylyp, týra ústine tógildi. Sol kezde onyń keýde qýysy kúıip, qatty shok aldy. Biz bir apta boıy jansaqtaý bóliminde jattyq. Segizinshi kúni ózdiginen dem ala bastady, tamaq ishti. Dárigerler balama ekinshi ómir syılady.

Reanımatologtardyń aıtýynsha, júrek toqtaǵannan keıin ony qaıta iske qosý tek 4-5 mınýt ishinde múmkin bolady. Biraq bul jaǵdaıda 10 mınýt ótken soń sábıdiń júregi qaıta soǵa bastady. Degenmen, birneshe kún boıy onyń ómiri qyl ústinde turdy – ol jasandy tynys alý apparatyna qosylyp, kúıikke qarsy terapııa aldy. Oqıǵa saldarynan balanyń denesiniń 25%-y qaınaǵan sýmen kúıip qalǵan.

Qazir sábıge eshqandaı qaýip joq, ol saýyǵyp keledi.

Nursultan Qurbanbekov, №2 kópsalaly balalar aýrýhanasynyń anestezıologııa, reanımaııa jáne qarqyndy terapııa bóliminiń meńgerýshisi:

– Biz júrek qyzmeti toqtaǵan jaǵdaıda qoldanylatyn adrenalındi tikeleı júrekke engizýge májbúr boldyq. Alǵashqy úsh táýlikte júrek qyzmetiniń toqtaýyna baılanysty jaǵdaıy turaqsyz boldy. Bul – óte sırek kezdesetin, biregeı jaǵdaı.