Жаңалықтар
Астанада су тапшылығы бар ма — Нұржан Нұржігітов жауап берді
Журналистер елордадағы су тапшылығы сценарийінің қайталануы қаншалықты мүмкін екенін сұрады.
«Астанада су тапшылығы болмайды деп нақты айта алады. Өйткені қаланы ауыз сумен қамтамасыз ететін Астана су қоймасы көктемгі су тасқыны кезеңінде 100 пайыздан астам толтырылды. Қазір су кестеге сай беріліп жатыр», – деді Нұржігітов жауабында.
Нұржігітов сүзу стансасының құрылысына қосымша 418 миллиард теңге бөлінгенін айтты.
«Бұл жұмыстар қаланы болашақта толық ауыз сумен қамтамасыз ету үшін қажет», – деді министр.
Бұған дейін Үкімет отырысында Индустрия және құрылыс министрі Ерсайын Нағаспаев бірқатар ірі қалалардағы ауыз судың сапасы мен тапшылығы мәселелері су тазарту құрылыстарын салу және жаңғырту арқылы шешілгенін хабарлады.
Сондай-ақ:
- Астанада жалпы сомасы 118 млрд теңгеге сорғы-сүзгі стансасы салынып, магистральдық су құбыры қайта жаңғыртылды;
- Атырауда жалпы сомасы 17 млрд теңгеге сүзгі стансасын қайта жаңғырту жұмыстары аяқталды;
- Қостанай мен Көкшетауда су тазарту құрылыстарын жаңғырту жұмыстары аяқталуда.
Бұған дейін Нұржан Нұржігітов Астана іргесіндегі Талапкер және Қажымұқан ауылдары қашан таза ауыз сумен қамтамасыз етілетінін айтқан болатын.
