استانادا سۋيتسيد جاساماق بولعان قىز قۇتقارىلدى

فوتو: اشىق دەرەككوز

استانادا جاس قىز كەشكىلىك ۋاقىتتا سۋيتسيد جاساماق بولىپ ەسىل وزەنىنە سەكىرگەن. ابىروي بولعاندا ونى بايقاپ قالعان ادامدار پوليتسەيلەرگە حابار بەرىپ, قىزدى دەر كەزىندە قۇتقارىپ قالدى, – دەپ حابارلايدى qandastar.kz arasha.kz-كە سىلتەمە جاساپ.

قۇتقارۋ تۋرالى بەينەنى كەزدەيسوق كۋاگەرلەر ءتۇسىرىپ العان. وقيعا 2 قازان كۇنى كەشكى ساعات 22:00 شاماسىندا بولدى. قر ءىىم ۇلتتىق ۇلانىنىڭ 5573 اسكەري ءبولىمىنىڭ جاساعىنا قالا تۇرعىنى جۇگىرىپ كەلىپ كومەك سۇرايدى. ونىڭ ايتۋىنشا, جاس قىز كوپىردەن ەسىل وزەنىنە سەكىرىپ كەتكەن. اسكەري جاساق باستىعى قاتارداعى جاۋىنگەر ناريمان مىرزاحمەتوۆ, ءپاترۋلشى ساربازدار دامير مۇقاشەۆ جانە داۆيد كورسۋنوۆپەن وقيعا ورنىنا جەدەل جەتىپ, بىردەن قىزدى قۇتقارا باستادى.

– قالا كوشەلەرىنىڭ تىنىشتىعىن قاداعالاۋ كەزىندە بىزگە بەيتانىس ادام كەلىپ, قىز بالانىڭ سۋعا باتىپ بارا جاتقانىن ايتتى. ءبىز دەرەۋ ونى قۇتقارۋعا كىرىستىك. راتسيا ارقىلى وسى وقيعا تۋرالى پاترۋلدىك توپ باستىعىنا حابارلادىق تا, بويجەتكەندى سۋدان شىعارۋعا تىرىستىق. ول جاعاعا جاقىن قاشىقتىقتا بولعاندىقتان, ەڭكەيىپ, ونىڭ قولىنان ۇستاي الدىم, ال ارىپتەستەرىم ونى جاعاعا شىعارۋعا كومەكتەستى. سودان كەيىن ءبىز قىزدى جىلى كورپە, بۋشلاتقا وراپ, جەدەل جاردەم كەلگەنگە دەيىن وعان العاشقى مەديتسينالىق كومەك كورسەتتىك. كەز كەلگەن ۋاقىتتا كومەك كورسەتۋگە دايىن بولۋ — بۇل ءبىزدىڭ مىندەتىمىز, – دەدى اسكەري جاساق باستىعى قاتارداعى مىرزاحمەتوۆ.

ۇلتتىق ۇلان اسكەري قىزمەتشىلەرىنىڭ ۇيلەسىمدى جانە كاسىبي ءىس-قيمىلدارى ارقاسىندا ادام ءومىرى امان قالدى. ساربازدار ءوز قىزمەتتەرىنىڭ ازاماتتاردىڭ قاۋىپسىزدىگىن قامتاماسىز ەتۋدە شەشۋشى ءرول اتقاراتىنىن تاعى دا دالەلدەدى.