استانادا تانىمال ترەنەر شاكىرتىن اياۋسىز سوققىعا جىققان

فوتو: اشىق دەرەككوز

استانادا جاتتىقتىرۋشى شاكىرتىن اياماي سوققىعا جىققان, دەپ حابارلايدى qandastar.kz

بۇل تۋرالى زارداپ شەگۋشىنىڭ اعاسى Liter.kz رەداكتسياسىنا حابارلاسقان.

استانا تۇرعىنى حابارلاسىپ, باۋىرى اۋىر جاراقاتتارمەن اۋرۋحانادا جاتقانىن, وعان جاتتىقتىرۋشىسى شابۋىل جاساعانىن ايتتى.

دامير ەسىمدى ازاماتتىڭ ايتۋىنشا, وقيعا 29 ناۋرىز كۇنى تاڭەرتەڭ بولعان. ونىڭ ءىنىسى سپورتزالعا بارعان, ول جەردە ءوزى جاتتىعىپ قانا قويماي, ماسساجيست بولىپ تا جۇمىس ىستەيتىن.

“بۇل قورقىنىشتى وقيعا ءبىزدىڭ وتباسىمىز ءۇشىن ۇلكەن سوققى بولدى. قازىر دارىگەرلەر ونىڭ دەنەسىندەگى بارلىق جاراقاتتاردى تىركەپ, تولىق تەكسەرۋ جۇرگىزدى. زامير دارىگەرلەردىڭ باقىلاۋىندا, ءبىز ونىڭ دەنساۋلىعى ءۇشىن قاتتى الاڭدايمىز… مرت مەن رەنتگەن ناتيجەلەرى قابىرعاسىنىڭ سىنعانىن جانە ميى شايقالعانىن كورسەتتى. سونىمەن قاتار, باسىنا جانە دەنەسىنە كوپتەگەن سوققىلار تيگەن. ول قاتتى اۋىرسىنۋ سالدارىنان قوزعالا المايدى, دارىگەرلەر كاتەتەر ورناتۋعا ءماجبۇر بولدى”, – دەدى دامير.

سونىمەن قاتار, زارداپ شەككەن جىگىتتىڭ ەرنى ىشكى جاعىنان جىرتىلعان.

“ەڭ سوراقىسى, مۇنىڭ ءبارىن زامير سەنىم ارتقان, قۇرمەتتەگەن جانە كومەكتەسكەن ادام جاسادى… زامير – وتە سابىرلى, ۇستامدى جىگىت, ەشقاشان جانجالعا بارمايدى, ۇنەمى تىڭداپ, بايىپپەن قارايدى. ول جاتتىقتىرۋشىعا بىردە-ءبىر سوققى تيگىزبەگەن, ال جاۋاپ رەتىندە 20-دان استام سوققى العان. ءتىپتى, ونى تۇنشىقتىرماق بولعان… جاتتىقتىرۋشىلار بۇلاي ارەكەت ەتپەۋى كەرەك”, – دەپ اشىندى دامير.

زارداپ شەككەن تاراپتىڭ ايتۋىنشا, جاتتىقتىرۋشى – تانىمال ادام, ول IronMan (ۇزاق قاشىقتاعى ترياتلونعا قاتىسۋشى) مارتەبەسىنىڭ يەگەرى.

جاقىندارى بۇل وقيعا بويىنشا پوليتسياعا ارىز تۇسىرگەن.

Instagram جەلىسىندە بۇل وقيعا قىزۋ تالقىلانىپ, كوپشىلىك جاتتىقتىرۋشىنىڭ قاتاڭ جازالانۋىن تالاپ ەتۋدە:

• “تولىقتاي كەلىسەمىن! اقىل-ەسى دۇرىس ادام بۇلاي جاسامايدى.”
• “نە بولعانى ماڭىزدى ەمەس, باستىسى – ءبىر ادام ەكىنشىسىنىڭ قولىنان اۋىر جاراقات الدى. بۇل جازاسىز قالماۋى كەرەك.”
• “نەتكەن سۇمدىق! قانداي جانجال بولسا دا, ول ادامعا قول كوتەرۋگە قۇقىلى ەمەس! ونىڭ ۇستىنە وسىنشالىقتى قاتىگەزدىكپەن ساباعان!”

Liter.kz رەداكتسياسى استانا قالاسى پوليتسيا دەپارتامەنتىنىڭ ءباسپاسوز قىزمەتىنە سۇراۋ جولدادى.

“بۇل فاكت بويىنشا استانا قالاسى نۇرا اۋدانى پوليتسيا باسقارماسى قر قك 107-بابىنىڭ 1-بولىگى – “دەنساۋلىققا قاساقانا ورتاشا اۋىرلىقتاعى زيان كەلتىرۋ” بويىنشا سوتقا دەيىنگى تەرگەۋ باستادى”, – دەپ حابارلادى ۆەدومستۆو.

قازىرگى ۋاقىتتا تەرگەۋ امالدارى جۇرگىزىلۋدە, ونىڭ ناتيجەسى بويىنشا قۇقىقتىق شەشىم قابىلدانادى.