جاڭالىقتار
استانادا تازالىق ەستافەتاسىنا 35 مىڭ ادام قاتىستى
استانا تۇرعىندارى ناۋرىزنامانىڭ سوڭعى كۇنىندە بەلگىلەنگەن «تازارۋ» ەكولوگيالىق اكتسياسىنا ءبىر كىسىدەي جۇمىلدى
«استانا جاستارى» ۆولونتەرلەر جەلىسى بۇگىن كوكتال ساياباعىندا سەنبىلىك ۇيىمداستىرىپ, قاريالاردىڭ اۋلالارىن قاردان تازالاۋعا بولىستى. تاڭمەن تالاسا ءبىر توپ ەرىكتى سارىارقا اۋدانىندا ورنالاسقان كوكتال ساياباعىنا كەلدى. استانالىق كوللەدج بەن جوعارى وقۋ ورىندارىنىڭ ستۋدەنتتەرى جول جيەكتەرى مەن سپورت الاڭىن قاردان تازارتۋعا بىلەك سىبانا كىرىستى. پەريزات ءابىلوۆا, ۆولونتيور: — ءبىز ناۋرىزناماعا وراي استانا جاستارى ۆولونتەرلارىمەن بىرگە قالامىزدى قاردان تازارتۋعا شىقتىق. سونىمەن قاتار ءبىز مۇمكىندىگى شەكتەۋلى ادامدارعا, قارت ادامدارعا كومەكتەسۋگە بارامىز. جۇمىس ىستەۋ بىزگە وڭاي بولىپ جاتىر. ءبىز 15 شاقتى ادام بولىپ كەلىپ وتىرمىز. اكتسيا كەزىندە ارىقتار دا قار مەن قوقىستان تازاردى. ال كوممۋنالدىق قىزمەت جۇمىسشىلارى ۇيىلگەن قاردى ءبىر دەمدە ارنايى پوليگونعا شىعاردى. جالپى «تازارۋ» كۇنىنە بەلگىلەنگەن سەنبىلىك شاھاردىڭ بارلىق كوشە, ساياباقتارىندا ۇيىمداستىرىلدى. سارىارقا اۋدانىنان 3200-دەي ادام بەلسەندىلىك تانىتقان.
ەرجان جۇماعۇلوۆ, «سارىارقا» اۋدانى اكىمىنىڭ ورىنباسارى: — بۇگىن وسى اكتسيا اياسىندا جالعىزباستى زەينەتكەرلەردىڭ ۇيلەرىنىڭ اۋلاسىنان قاردى تازالايمىز. سونىمەن قاتار اۋدانداردان 270-تەن استام ارنايى تەحنيكا, 645 جول جۇمىسكەرلەرى جۇمىلدىرىلعان. استانالىق تۇرعىن ءۇي كەشەندەرىندە دە تازالىق شاراسى ءوتتى. كوممۋنالدىق قىزمەتتەر ايالداما پاۆيلوندارى مەن كوپىرلەردى جۋعا كىرىستى. باس شاھارداعى «تازالىق ەستافەتاسىنا» 35 مىڭداي ادام جۇمىلعان. ولاردىڭ قاتارىندا ۆولونتەرلەر مەن كاسىپكەرلەر دە بولدى.
