استانادا تسون قىزمەتكەرى زاڭسىز ين راسىمدەگەنى ءۇشىن سوتتالدى

استاناداعى قىلمىستىق ىستەر جونىندەگى اۋدانارالىق سوت بۇرىنعى تسون قىزمەتكەرىنە ۇكىم شىعاردى, دەپ حابارلايدى Qandastar.kz

ول اقپاراتتىق جۇيەگە ادەيى جالعان مالىمەت ەنگىزىپ, اۋىر زارداپتارعا اكەلگەنى ءۇشىن ايىپتالدى (قر قك 206-باپ, 3-ءبولىم, 2-تارماق).

سوت دەرەگىنشە, 2024 جىلعى 8 قازاندا ايىپتالۋشى قاساقانا ارەكەت جاساپ, بەلگىسىز تۇلعا تاپسىرعان قۇجاتتار نەگىزىندە رەسەي ازاماتىنىڭ اتىنا زاڭسىز جەكە سايكەستەندىرۋ ءنومىرىن (ين) راسىمدەگەن. كەيىن وسى ين ارقىلى بانكتىك شوت اشىلىپ, وعان 40 ميلليون تەڭگە اۋدارىلعان.

بۇل جاعدايدان زارداپ شەككەن تەك ازامات قانا ەمەس, مەملەكەت تە شىعىنعا ۇشىراعان. ايىپتالۋشى ءوز كىناسىن مويىندامادى. الايدا سوت ونىڭ كىناسى دالەلدەنگەنىن ايتىپ, ەكى كىشكەنتاي بالاسىنىڭ بارىن جەڭىلدەتەتىن جاعداي رەتىندە ەسەپكە الدى. ەشقانداي اۋىرلاتاتىن جاعداي بولماعاندىقتان, ايەلگە ءۇش جىل باس بوستاندىعىنان ايىرۋ جازاسى تاعايىندالدى. سونىمەن قاتار وعان ەكى جىل بويى شەتەل ازاماتتارى مەن ازاماتتىعى جوق تۇلعالارعا ين راسىمدەۋگە تىيىم سالىندى. «اشىق جاريالانعان ۇكىم تسون وپەراتورلارىنىڭ قاتىسۋىمەن وقىلدى.

بۇل – مۇنداي قىلمىستاردىڭ الدىن الۋ ماقساتىندا جاسالدى», – دەپ حابارلادى استانا سوتىنىڭ ءباسپاسوز قىزمەتى.

ايتا كەتەيىك, راقىمشىلىق تۋرالى زاڭعا سايكەس جازانىڭ مەرزىمى ۇشتەن بىرگە قىسقارتىلىپ, ەكى جىلعا ازايتىلدى. جازاسىن ايەل قاۋىپسىزدىگى ەڭ تومەن كولونيادا وتەيدى.