Astanada ON qyzmetkeri zańsyz IIN rásimdegeni úshin sottaldy

Astanadaǵy qylmystyq ister jónindegi aýdanaralyq sot burynǵy ON qyzmetkerine úkim shyǵardy, dep habarlaıdy Qandastar.kz

Ol aqparattyq júıege ádeıi jalǵan málimet engizip, aýyr zardaptarǵa ákelgeni úshin aıyptaldy (QR QK 206-bap, 3-bólim, 2-tarmaq).

Sot dereginshe, 2024 jylǵy 8 qazanda aıyptalýshy qasaqana áreket jasap, belgisiz tulǵa tapsyrǵan qujattar negizinde Reseı azamatynyń atyna zańsyz jeke sáıkestendirý nómirin (IIN) rásimdegen. Keıin osy IIN arqyly banktik shot ashylyp, oǵan 40 mıllıon teńge aýdarylǵan.

Bul jaǵdaıdan zardap shekken tek azamat qana emes, memleket te shyǵynǵa ushyraǵan. Aıyptalýshy óz kinásin moıyndamady. Alaıda sot onyń kinási dáleldengenin aıtyp, eki kishkentaı balasynyń baryn jeńildetetin jaǵdaı retinde esepke aldy. Eshqandaı aýyrlatatyn jaǵdaı bolmaǵandyqtan, áıelge úsh jyl bas bostandyǵynan aıyrý jazasy taǵaıyndaldy. Sonymen qatar oǵan eki jyl boıy shetel azamattary men azamattyǵy joq tulǵalarǵa IIN rásimdeýge tyıym salyndy. «Ashyq jarııalanǵan úkim ON operatorlarynyń qatysýymen oqyldy.

Bul – mundaı qylmystardyń aldyn alý maqsatynda jasaldy», – dep habarlady Astana sotynyń baspasóz qyzmeti.

Aıta keteıik, raqymshylyq týraly zańǵa sáıkes jazanyń merzimi úshten birge qysqartylyp, eki jylǵa azaıtyldy. Jazasyn áıel qaýipsizdigi eń tómen kolonııada óteıdi.