الەۋمەت جانە قوعام
استانادا ءۇش «قايىرىمدىلىق قورى» حالىقتان 340 ميلليون تەڭگە جيناعان: بۇل ءۇشىن ولار جاسوسپىرىمدەردى جۇمىسقا تارتقان
فوتو: ru.trend.az
استانادا جاسوسپىرىمدەردى پايدالانىپ, قوعامدىق ورىنداردا زاڭسىز اقشا جيناۋ دەرەكتەرى تىركەلدى. بالالاردى قايىرىمدىلىق قورلارى كەلىسىمشارتسىز جۇمىسقا جەككەن, دەپ جازادى qandastar.kz
بۇل تۋرالى Stan.kz اقپارات اگەنتتىگى حابارلايدى.
استانا قالاسى پروكۋراتۋراسىنىڭ ۇيلەستىرۋىمەن ساياباقتاردا, ويىن-ساۋىق ورتالىقتارىندا, قوعامدىق كولىكتەردە جانە كوشەلەردە رەيدتەر جۇرگىزىلدى.
بارلىعى 8 كامەلەتكە تولماعان (2008-2010 جىلدارى) ءجاسوسپىرىم انىقتالدى. ولارمەن ەشقانداي كەلىسىمشارت جاسالماستان, 3 قايىرىمدىلىق قورى ولاردى ۆولونتەر رەتىندە تارتقان (اكىمشىلىك قۇقىق بۇزۋشىلىق تۋرالى كودەكستىڭ 86-بابىنىڭ 3-بولىگىن بۇزۋ).
اتالعان قورلار «قايىرىمدىلىق» دەگەن جەلەۋمەن وزگە ماقساتتارعا شامامەن 340 ميلليون تەڭگە جيناعان. دەرەك بويىنشا (قىلمىستىق كودەكستىڭ 190-بابى 2-بولىگىنىڭ 1-تارماعى بويىنشا) قىلمىستىق ءىس قوزعالدى. ءىس اياسىندا كامەلەتكە تولماعانداردى زاڭسىز ارەكەتكە تارتقانى ءۇشىن قوردىڭ لاۋازىمدى تۇلعالارىنىڭ ءىس-ارەكەتتەرىنە بولەك قۇقىقتىق باعا بەرىلەدى.
كامەلەتكە تولماعانداردى قۇقىق بۇزۋشىلىققا تارتۋ قىلمىستىق جاۋاپكەرشىلىككە اكەلەتىنىن تۇسىندىرەمىز (قىلمىستىق كودەكستىڭ 132-بابى). بۇدان بولەك, ەڭبەك كودەكسىنىڭ 31-بابىندا كامەلەتكە تولماعاندارعا ەرەكشە ەڭبەك شارتتارى قاراستىرىلعان (16 جاستان باستاپ ەڭبەك شارتى مىندەتتى تۇردە جاسالۋعا تيىس, ال 14 جاستان باستاپ ول زاڭدى وكىلىنىڭ كەلىسىمىمەن عانا راسىمدەلە الادى). اتالعان تالاپتاردى بۇزعان جۇمىس بەرۋشىلەر اكىمشىلىك قۇقىق بۇزۋشىلىق تۋرالى كودەكستىڭ 86-بابى بويىنشا جاۋاپكەرشىلىككە تارتىلادى.
ەسكە سالايىق, بۇعان دەيىن استانادا ەرلى-زايىپتى ۇلىنىڭ ەمىنە دەپ حالىقتان 1,3 ملرد تەڭگە جيناپ, قاراجاتتى ءوز قاجەتتىلىكتەرىنە جۇمساعانى ءۇشىن جاۋاپقا تارتىلماق. تەرگەۋ بارىسىندا ولاردىڭ تەك 6,4 ملن تەڭگەنى عانا ەمگە پايدالانعانى انىقتالدى. قالعان اقشاعا بىرنەشە پاتەر, كولىك, جەر تەلىمى الىپ, ءبىر بولىگىن قۇمار ويىنعا جۇمساعان. سونىمەن قاتار, شەتەلدە وتا جاساتامىز دەپ جالعان اقپارات تاراتقان. سوت سانكتسياسىمەن ولاردىڭ بارلىق مۇلكىنە تىيىم سالىندى, ال كۇدىكتىلەر ۇيقاماقتا وتىر. قىلمىستىق ءىس سوتتا قارالىپ جاتىر.
