Astanada úsh «qaıyrymdylyq qory» halyqtan 340 mıllıon teńge jınaǵan: Bul úshin olar jasóspirimderdi jumysqa tartqan

Foto: ru.trend.az

Astanada jasóspirimderdi paıdalanyp, qoǵamdyq oryndarda zańsyz aqsha jınaý derekteri tirkeldi. Balalardy qaıyrymdylyq qorlary kelisimshartsyz jumysqa jekken, dep jazady qandastar.kz

Bul týraly Stan.kz aqparat agenttigi habarlaıdy.

Astana qalasy prokýratýrasynyń úılestirýimen saıabaqtarda, oıyn-saýyq ortalyqtarynda, qoǵamdyq kólikterde jáne kóshelerde reıdter júrgizildi.

Barlyǵy 8 kámeletke tolmaǵan (2008-2010 jyldary) jasóspirim anyqtaldy. Olarmen eshqandaı kelisimshart jasalmastan, 3 qaıyrymdylyq qory olardy volonter retinde tartqan (Ákimshilik quqyq buzýshylyq týraly kodekstiń 86-babynyń 3-bóligin buzý).

Atalǵan qorlar «qaıyrymdylyq» degen jeleýmen ózge maqsattarǵa shamamen 340 mıllıon teńge jınaǵan. Derek boıynsha (Qylmystyq kodekstiń 190-baby 2-bóliginiń 1-tarmaǵy boıynsha) qylmystyq is qozǵaldy. Is aıasynda kámeletke tolmaǵandardy zańsyz áreketke tartqany úshin qordyń laýazymdy tulǵalarynyń is-áreketterine bólek quqyqtyq baǵa beriledi.

Kámeletke tolmaǵandardy quqyq buzýshylyqqa tartý qylmystyq jaýapkershilikke ákeletinin túsindiremiz (Qylmystyq kodekstiń 132-baby). Budan bólek, Eńbek kodeksiniń 31-babynda kámeletke tolmaǵandarǵa erekshe eńbek sharttary qarastyrylǵan (16 jastan bastap eńbek sharty mindetti túrde jasalýǵa tıis, al 14 jastan bastap ol zańdy ókiliniń kelisimimen ǵana rásimdele alady). Atalǵan talaptardy buzǵan jumys berýshiler Ákimshilik quqyq buzýshylyq týraly kodekstiń 86-baby boıynsha jaýapkershilikke tartylady.

Eske salaıyq, buǵan deıin Astanada erli-zaıypty ulynyń emine dep halyqtan 1,3 mlrd teńge jınap, qarajatty óz qajettilikterine jumsaǵany úshin jaýapqa tartylmaq. Tergeý barysynda olardyń tek 6,4 mln teńgeni ǵana emge paıdalanǵany anyqtaldy. Qalǵan aqshaǵa birneshe páter, kólik, jer telimi alyp, bir bóligin qumar oıynǵa jumsaǵan. Sonymen qatar, shetelde ota jasatamyz dep jalǵan aqparat taratqan. Sot sankııasymen olardyń barlyq múlkine tyıym salyndy, al kúdiktiler úıqamaqta otyr. Qylmystyq is sotta qaralyp jatyr.