استانادا جىگىت تۋىستارىن پىشاقتادى: زارداپ شەككەندەردىڭ جاعدايى بەلگىلى بولدى

استانادا تۋىسقانىنىڭ پىشاق شابۋىلىنان زارداپ شەككەندەر №1 كوپسالالى قالالىق اۋرۋحاناعا جاتقىزىلدى. ولاردىڭ ءبىرى جانساقتاۋ بولىمىندە, دەپ جازدى qandastar.kz

استانادا تۋىستارىن پىشاقتادى دەپ كۇدىككە ىلىنگەن 21 جاستاعى جىگىت ۇستالدى. شابۋىل سالدارىنان ونىڭ 28 جاستاعى ناعاشى اعاسى مەرت بولىپ, ءۇش تۋىسى اۋرۋحاناعا جەتكىزىلدى.

«1964 جىلعى ايەلدىڭ دەنەسىنىڭ ءار جەرىندە بىرنەشە رەت پىشاق جاراقاتتارى, سول جاق قابىرعاسىنىڭ سىنعانى انىقتالدى. ول اۋىر حالدە اۋرۋحاناعا جەتكىزىلىپ, وتا جاسالدى, قازىر جانساقتاۋ بولىمىندە جاتىر», – دەپ حابارلادى استانا دەنساۋلىق ساقتاۋ باسقارماسى.

شابۋىلشىنىڭ تاعى ءبىر ناعاشى اپكەسى دە ءتۇرلى جاراقاتتار العان.

«50 جاستاعى ايەل دە ءتۇرلى پىشاق جاراقاتتارىن الىپ, دەنەسى كوگەرگەن, باس سۇيەك-مي جاراقاتى, وڭ جاق قابىرعاسى سىنىپ, ەمحاناعا جاتقىزىلدى. ونىڭ جالپى جاعدايى ورتاشا جانە تۇراقتى», – دەپ حابارلادى ۆەدومستۆودان.

ال 18 جاستاعى ناعاشى قارىنداسى حيرۋرگيا بولىمىنە جاتقىزىلدى. ونىڭ جالپى جاعدايى ورتاشا جانە تۇراقتى.

ادام ءولتىرۋ دەرەگى بويىنشا قىلمىستىق ءىس قوزعالدى.