استانادا جۋرناليست لۇقپان احمەدياروۆ ۇستالدى

استانادا بەلگىلى جۋرناليست لۇقپان احمەدياروۆتى پوليتسيا ۇستاپ اكەتتى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

جۋرناليست Instagram جەلىسىندە تىكەلەي ەفيرگە شىعىپ, پوليتسيانىڭ وعان قىلمىستىق ءىس قوزعالعانى تۋرالى حابارلاعانىن ايتىپ ۇلگەرگەن. جۋرناليست ءوزىنىڭ ۇستالۋىنا باتىس قازاقستاننان ەر ادامداردى جۇمىسقا جىبەرەمىز دەگەن سىلتاۋمەن رەسەيگە اپارىپ, كەيىن رەسەيدىڭ قورعانىس مينيسترلىگىمەن كەلىسىمشارتقا قول قويعىزۋعا ماجبۇرلەيتىنى جايلى جاريالاعان جازبالارى سەبەپ بولعانىن ايتادى.

استانا قالالىق پوليتسيا دەپارتامەنتى جۋرناليستكە قاتىستى سوتقا دەيىنگى تەرگەۋ باستالعانىن راستادى. تەرگەۋدىڭ باستالۋىنا ورال قالاسىنىڭ تۇرعىنىنىڭ ارىزى نەگىز بولعان. قىلمىستىق ءىس «كورىنەۋ جالعان اقپارات تاراتۋ» بابى بويىنشا تىركەلگەن.

«قىلمىستىق ءىس اياسىندا ازامات ا تەرگەۋ ارەكەتتەرىن جۇرگىزۋ ءۇشىن پوليتسياعا جەتكىزىلدى. تەرگەۋ مۇددەسىنە بايلانىستى وزگە اقپارات جاريا ەتىلمەيدى», – دەلىنگەن پوليتسيا حابارلاماسىندا.

كەيىنىرەك لۇقپان احمەدياروۆتىڭ ءوزى پوليتسيا تەرگەۋىنەن شىققانىن, تەرگەۋ ەرتەڭ جالعاساتىنىن مالىمدەدى.

“وكىنىشكە قاراي, تەرگەۋ مالىمەتتەرىن ايتۋعا قۇقىعىم جوق. 274-باپتىڭ 3-بولىگى بويىنشا قىلمىستىق ءىس قوزعالعانىن عانا ايتا الامىن. مەنى قورعانۋعا قۇقىعى بار كۋاگەر رەتىندە پوليتسياعا كۇشتەپ جەتكىزدى. ارينە, مەن نارازىلىعىمدى ايتتىم», – دەدى تەرگەۋدەن شىققاننان كەيىن لۇقپان احمەدياروۆ.

ايتا كەتەيىك, لۇقپان احمەدياروۆ – قازاقستاندىق ساياسي جۋرناليست, قوعام بەلسەندىسى, تاۋەلسىز «ۋرالسكايا نەدەليا» گازەتىنىڭ بۇرىنعى باس رەداكتورى.