جاڭالىقتار
استاناداعى LRT قاشان ىسكە قوسىلادى?
فوتو: اشىق دەرەككوز
استاناداعى جەڭىل رەلستى كولىك (LRT) جوباسى بيىل قىركۇيەك ايىندا ىسكە قوسىلادى. بۇل تۋرالى CTS جشس باسقارما توراعاسى اسىلبەك دۇيسەباەۆ مالىمدەدى, – دەپ حابارلايدى qandastar.kz
جوبا تۋرالى اقپارات پرەمەر-مينيستر ولجاس بەكتەنوۆتىڭ ەلوردانىڭ ينفراقۇرىلىمدىق جوبالارىن تەكسەرۋ ساپارى بارىسىندا ايتىلدى. CTS باسشىسىنىڭ ايتۋىنشا, قازىرگى ۋاقىتتا LRT جۇيەسى GoA4 حالىقارالىق ستاندارتىنا ساي كەلەتىن سىناق كەزەڭىنەن وتۋدە. الداعى ۋاقىتتا جولاۋشىسىز پويىزداردى تەستىلىك رەجيمدە ىسكە قوسۋ جوسپارلانىپ وتىر.
سونىمەن قاتار پرەمەر-مينيسترگە LRT بويىنداعى اۋماقتى اباتتاندىرۋ جوباسى تانىستىرىلدى. اۋەجايدان رىسقۇلوۆ كوشەسىنە دەيىن ءىرى اعاشتار مەن كوپجىلدىق بۇتالار وتىرعىزىلىپ, اۆتوماتتى سۋارۋ جۇيەسىن ورناتۋ جوسپارلانعان. قابانباي باتىر داڭعىلى بويىمەن سىعاناق كوشەسىنە دەيىنگى اۋماق بالالار جانە سپورت الاڭدارى, جاياۋ جۇرگىنشىلەر جولدارى قوعامدىق كەڭىستىكتەرگە بولىنگەن. ءارى قاراي جولاۋشىلار اعىنى بەلسەندى 2-تەمىرجول ۆوكزالىنا دەيىن كەڭ اۆتوتۇراقتار, ۆەلوسيپەدكە ارنالعان جولدار جاسالىپ, كوگالداندىرۋ قاراستىرىلعان.
