جاڭالىقتار
استاناداعى LRT جەلىسىندە اسىلىپ تۇرعان ەر ادام تابىلدى
فوتو: ازاتتىق
24 قىركۇيەك تاڭەرتەڭ استانا قالاسىندا LRT قۇرىلىسى ءجۇرىپ جاتقان جەردە ەر ادام ءولى تابىلدى.
جەرگىلىكتى تەلەگرام-ارنالار وقيعا ورنىنان تۇسىرىلگەن ۆيدەو جاريالادى. وندا LRT جەلىسىنىڭ بەتون تىرەكتەرىنىڭ ۇستىندەگى جولدىڭ سىرت جاعىندا اسىلىپ تۇرعان ادام كورىنەدى.
«24 قىركۇيەكتە «103» قىزمەتىنە قوڭىراۋ ءتۇستى. وقيعا ورنىندا اسىلىپ تۇرعان ەر ادام ءولى تابىلدى. وقيعانىڭ ءمان-جايى بەلگىسىز, ءمايىتتى پوليتسيا الدى», – دەپ حابارلادى استانانىڭ دەنساۋلىق ساقتاۋ باسقارماسى.
استانا پوليتسيا دەپارتامەنتىنىڭ حابارلاۋىنشا, 38 جاستاعى مارقۇمنىڭ كىم ەكەنى انىقتالعان. وسى جايتقا بايلانىستى قىلمىستىق ءىس قوزعالدى, تەرگەۋ ءجۇرىپ جاتىر دەدى پوليتسيا. بىراق ول مارقۇمنىڭ اتى-ءجونىن جاريالامادى. بۇل وقيعانىڭ جاي-جاپسارى ازىرگە بەلگىسىز.
Newtimes.kz سايتى سويلەسكەن قۇرىلىس نىسانىنىڭ كۇزەتشىسى وتكەن ءتۇنى اۋماق ق ۇلىپتاۋلى بولعان دەدى. ونىڭ سوزىنشە, سەيسەنبى كۇنى تاڭەرتەڭ الگى ادام ءولى تابىلعان جەرگە پوليتسيا مەن ارنايى قىزمەت وكىلدەرى بارعان. مارقۇمدى قۇرىلىس كرانىمەن تومەن تۇسىرگەن.
