جاڭالىقتار
استاناداعى ورتتەن ەشكىم زارداپ شەكپەگەن
فوتو: Kazinform
استانالىق ءورت سوندىرۋشىلەر ءتىلسىز جاۋمەن ءالى كۇرەسىپ جاتىر. Kazinform تىلشىسى وقيعا ورنىنا بارىپ كەلدى.
بايقاعاندارىڭىزداي, ورتپەن كۇرەس ءالى ءجۇرىپ جاتىر. وقيعا ورنىنا جينالعان ادامدار جاعدايدى باقىلاپ وتىر.
توتەنشە جاعداي بولعان جەردە ءورت ءسوندىرۋ, ءتارتىپ ساقشىلارى جانە جەدەل جاردەم قىزمەتىن باقىلاۋعا بولادى.
جەرگىلىكتى تۇرعىنداردى اڭگىمەگە تارتقان ەدىك, وكىنىشكە قاراي پىكىر بىلدىرۋدەن باس تارتتى.
«قازىرگى ۋاقىتتا جوعارى قىسىمدى سورعىلار جۇمىس ىستەپ جاتىر. ءسوندىرۋ جۇمىسى جالعاسۋدا. زارداپ شەككەندەر تۋرالى اقپارات تۇسكەن جوق» دەيدى تجم ءباسپاسوز قىزمەتىنەن.
وقيعا ورنىندا توتەنشە جاعداي ءمينيسترى شىڭعىس ءارىنوۆ ءجۇر.
ەسكە سالا كەتەيىك, بۇگىن استانادا كوپقاباتتى ءۇيدىڭ 26-قاباتىنان ءورت شىقتى.
قۇتقارۋشىلار 8 ادامدى قاۋىپسىز جەرگە شىعاردى, ونىڭ ىشىندە ءبىر بالا بار. ارنايى شتاب قۇرىلدى.
