جاڭالىقتار
استانادان بۋرابايعا جاڭا تۋريستىك پويىز جولعا شىقتى
فوتو: اشىق دەرەككوز
استانادان بۋرابايعا جاڭا تۋريستىك پويىز جولعا شىقتى, دەپ جازدى qandastar.kz
بۇگىن ەلوردادان ەلىمىزدىڭ ەڭ تانىمال كۋرورتتى ايماقتارىنىڭ ءبىرى – بۋرابايعا جاڭا تۋريستىك پويىز جولعا شىقتى. جاڭا پويىزدىڭ ۆاگوندارىنا ەلوردانىڭ بىرەگەي كورنەكى جەرلەرى, اتاپ ايتقاندا, بايتەرەك, قازاق ەلى مونۋمەنتى, نۇر-الەم جانە باسقا دا نىساندارى بەينەلەنگەن. سونداي-اق ۆاگونداردا Visit Astana جانە Visit Aqmola وڭىرلەرىنىڭ تۋريستىك برەندتەرى ورنالاستىرىلعان. ۆاگونداردىڭ ىشكى بەزەندىرىلۋىنەن استانا قالاسىنىڭ مادەني ەرەكشەلىكتەرىن جانە بۋراباي كۋرورتتى ايماعىنىڭ تابيعي سۇلۋلىعىن كورۋگە بولادى. پويىزدىڭ تاعى ءبىر ەرەكشەلىگى – ەكسكليۋزيۆتى اۋديو تۋر. ساپار بارىسىندا جولاۋشىلار استانا مەن بۋرابايدىڭ تاريحى, مادەنيەتى مەن تابيعي بايلىعى تۋرالى قىزىقتى دەرەكتەرگە قانىعا الادى.
«جاڭا تۋريستىك پويىزدى ىسكە قوسۋ – ىشكى ءتۋريزمدى دامىتۋ جانە قازاقستان بويىنشا ساياحاتتاۋعا جاڭا مۇمكىندىكتەر اشۋ جولىنداعى ماڭىزدى قادام. بۇل جوبا ەل تۇرعىندارى مەن قوناقتارى ءۇشىن ەڭ ادەمى كۋرورتتى ايماققا ەركىن جەتۋگە مۇمكىندىك بەرەدى», – دەدى قر تسم تۋريزم يندۋسترياسى كوميتەتىنىڭ توراعاسى نۇرتاس كارىپباەۆ.
پويىز نۇرلى جول (استانا) ستانتسياسى مەن بۋراباي كۋرورتى اراسىندا توقتاۋسىز جۇرەدى. جول ءجۇرۋ ۋاقىتى – 2 ساعات 26 مينۋت.
