جاڭالىقتار
استانالىق ايەل ءتىرى ۇلىن ء«ولتىرىپ», 100-گە جۋىق ارىپتەسىنەن اقشا جيناعان
فوتو: Threads.com/@mmr.kz
استانادا گۇلميرا اشيموۆا ەسىمدى ايەل “ ۇلىم تەرەزەدەن قۇلاپ كەتتى” دەپ وتىرىك ايتىپ, ارىپتەستەرىن 2 ميلليون تەڭگەدەن استام اقشاعا سان سوقتىرىپ كەتكەن, دەپ جازدى qandastar.kz
بۇل تۋرالى Stan.kzاقپارات اگەنتتىگى حابارلايدى.
مادينا ەسىمدى جەلى قولدانۋشىسىنىڭ سوزىنشە, گۇلميرا اشيموۆا 25 تامىز كۇنى ۇلىنىڭ 4-قاباتتىڭ تەرەزەسىنەن قۇلاپ كەتىپ, ەرتەسى كۇنى كوماعا تۇسكەنىن ايتقان.
“جىلاپ جازدى. 27 تامىز كۇنى ەسىن جيعان. سۇيەكتەرى كوپ جەردەن سىنىپ, كوكباۋىرىن الىپ تاستادى دەدى. قاڭقالىق قۇرىلىمدى ورناتۋ ءۇشىن وپەراتسيا كەرەگىن ايتتى”, – دەپ جازدى جابىرلەنۋشى.
فوتو: Threads.com/@mmr.kz
ايەل قۇرىلعىنى الۋ ءۇشىن قوماقتى قاراجات كەرەك ەكەنىن, ونى الۋ ءۇشىن بانكتەن نەسيە العالى جاتقانىن ايتقاندا ارىپتەسى جۇمىستاعىلاردان اقشا جيناپ, 500 مىڭ تەڭگە سالىپ جىبەرگەن. سونداي-اق گۇلميرا باسشىلىققا اۋديوحابارلاما جىبەرىپ, كەزەگەن جۇيكە ستيمۋلياتورىن ساتىپ الۋعا قارجىلاي كومەكتەسۋىن سۇراعان. ستيمۋلياتوردى بالانىڭ زاقىمدانعان ومىرتقاسىنا ورناتاتىنىن ايتقان. وعان بەيجاي قاراي الماعان ارىپتەستەرى اقشا جىبەرگەن.
فوتو: Threads.com/@mmr.kz
“باسشىلىق تا ايەل سۇراعان قاراجاتتان كوپ مولشەردە قارجىلاي كومەك كورسەتكەن. قىرعىزستان, قازاقستان مەن رەسەيدەگى ارىپتەستەرى بالانىڭ دەنساۋلىعىنا قاتتى الاڭدادى. گۇلميرا وتىرىك ايتۋىن توقتاتپادى. ول بالانىڭ زوند ارقىلى تاماقتانىپ جاتقانىن, تەك سۋ ءىشىپ, قۇسىپ جاتقانىن ايتتى. بىردە وعان وتا جاسالدى, بىردە وتانىڭ جاسالىپ, 8 ساعاتقا سوزىلعانىن ايتتى. وسىلايشا ۇيالماي, “ەمگە” دەپ اقشا جيناي بەردى. 5 قىركۇيەككە قاراعان ءتۇنى گۇلميرا بالام قايتىس بولدى دەدى. ول ارىپتەسىنە دەنەنى سويىپ, اشۋ ءۇشىن مايىتحاناعا الىپ كەتكەنىن ايتقان. اقشا ءۇشىن “ ۇلىم ءولدى” دەپ ايتتى. ەندى ول ۇلىنىڭ جەرلەۋىنە اقشا جيناعان. گۇلميرانىڭ وزىمەن سويلەسكەن ءلاززات دەگەن ارىپتەسى باسقالاردان اقشا جيناپ, كوز جاسىنا ەرىك بەرىپ, بارىنشا قولداۋ كورسەتتى”, – دەپ جازدى جەلى قولدانۋشىسى.
فوتو: Threads.com/@mmr.kz
ءسويتىپ ول گۇلميرانىڭ قازىرگى كۇيەۋىمەن حابارلاسىپ, جاعدايدىڭ جاي-جاپسارىن سۇراستىرعان. الايدا كۇيەۋى قايتىس بولدى دەگەن ءامىردىڭ ساباقتا ەكەنىن, ال گۇلميرانىڭ ءوزى جۇمىس ورنى سۇلۋلىق سالونىندا ەكەنىن ايتقان. ايەل اقشا ءۇشىن وتىرىكتى قيىننان قيىستىرعان. بارلىعى اشكەرە بولعاندا وزىمەن سويلەسكەن ارىپتەسىنە ەشكىمگە ايتپاۋىن سۇراپ, ءبارىن تۇسىندىرەمىن دەپ ۋادە بەرگەن.
“ارىپتەستەرىنىڭ كارتامەن اۋدارعان قاراجاتى مەن قولما-قول اقشاسىز جاسالعان اۋدارىمدار كۇيەۋىنىڭ جەكە كاسىپكەرلىك شوتىنا تۇسكەن. ءارتۇرلى جاعدايلار بولادى, بىراق ادامگەرشىلىكتەن اتتاۋعا بولمايدى. ءبىز قانشا كۇن بالا ءۇشىن ۋايىمدادىق. ادامداردىڭ سەزىمىمەن ويناۋعا بولمايدى. مۇنى اقتاپ الۋعا كەلمەيدى”, – دەپ جازدى مادينا.
فوتو: Threads.com/@mmr.kz
Stan.kz ءتىلشىسى گۇلميرا اشيموۆامەن سويلەسكەن جابىرلەنۋشى لاززاتپەن سويلەستى. ايتۋىنشا, جابىرەنۋشىلەر گۇلميرانىڭ ۇستىنەن پوليتسياعا ارىز جازعان.
“جابىرلەنۋشىلەردىڭ سانى شامامەن 100-گە جۋىق. كەلتىرىلگەن شىعىن 2,5 ميلليوننان استام. پوليتسيا قىلمىستىق كودەكستىڭ 190-بابى 2-بولىگى (الاياقتىق) بويىنشا ءىس قوزعادى. قازىر تەرگەۋ جۇمىستارى ءجۇرىپ جاتىر. گۇلميرانىڭ وزىمەن سويلەسكەن جوقپىن, باسشىلىق سويلەستى. بارلىعىن قايتارۋعا ۋادە بەردى”, – دەپ جاۋاپ بەردى جابىرلەنۋشىلەردىڭ ءبىرى.
سونداي-اق جابىرلەنۋشى وزدەرىن سان سوقتىرىپ كەتكەن گۇلميرا اشيموۆانىڭ ۇلتتىق ۇلانداعى پودپولكوۆنيكتىڭ ايەلى ەكەنىن ايتتى.
