جاڭالىقتار
استانالىق ەرلى-زايىپتى اۋرۋىنان ايىققان بالاسىنىڭ ەمىنە 1,3 ملرد تەڭگە جيناپ العان
استانادا ەرلى-زايىپتىلار بالالارىنىڭ ەمىنە جينالعان 1,3 ميلليارد تەڭگەنى جىمقىردى دەگەن كۇدىككە ءىلىندى, دەپ حابارلادى Qandastar.kz
بۇل تۋرالى جۋرناليست ميحايل كوزاچكوۆ ءوزىنىڭ Telegram-ارناسىندا ءمالىم ەتتى.
ونىڭ مالىمەتىنشە, داۋلەت پەن تولقىن توتاقانوۆتار اۋىر دياگنوز قويىلعان ۇلدارى التايىرعا وتا جاساۋ ءۇشىن قاراجات جيناعان. ەمگە قاجەت 50 ميلليون تەڭگە بالانىڭ Instagram پاراقشاسى ارقىلى جينالعان. الايدا اتا-اناسى جارناماعا اقشا سالىپ, بەلسەندى تۇردە قاراجات جيناۋدى جالعاستىرا بەرگەن. ناتيجەسىندە ءتورت جىل ىشىندە ولار 350 مىڭنان استام ادامنىڭ كومەگىمەن 1,3 ميلليارد تەڭگەدەن استام قاراجات جيناعان.
ءجۋرناليستىڭ ايتۋىنشا, ناقتى ەمدەلۋگە شامامەن 6 ميلليون تەڭگە عانا جۇمسالعان, ال قالعان قاراجات جەكە قاجەتتىلىكتەرگە – جىلجىمايتىن م ۇلىك پەن اۆتوكولىك ساتىپ الۋعا, شەتەلگە ساياحاتتاۋعا جانە قۇمار ويىندارعا كەتكەن.
اقپاراتتى استانا سوتىنىڭ ءباسپاسوز قىزمەتى راستادى.
«ەرلى-زايىپتىلارى 2020 جىلدان 2024 جىلعا دەيىنگى ارالىقتا Instagram جەلىسىندەگى (@altair_tota) پاراقشا ارقىلى بالاسىنىڭ اۋرۋىنا قاتىستى جالعان مالىمەتتەر مەن ەموتسيالىق ۇندەۋلەردى پايدالانىپ, بالانى ەمدەۋگە دەپ قايىرىمدىلىق قاراجات جيناۋدى ۇيىمداستىرعان. الايدا جينالعان قارجىنىڭ ەداۋىر بولىگى (1,3 ميلليارد تەڭگەدەن استام) جەكە قاجەتتىلىكتەرگە – قۇمار ويىندارعا, برەندتى كيىمدەرگە, ساياحاتتارعا جانە باسقا دا ماقساتتارعا جۇمسالعان», – دەلىنگەن سوت حابارلاماسىندا.
قازىر اتا-اناعا «اسا ءىرى كولەمدەگى الاياقتىق» جانە «قىلمىستىق جولمەن الىنعان اقشالاي قاراجاتتى زاڭداستىرۋ» باپتارى بويىنشا ايىپ تاعىلىپ وتىر. قىلمىستىق ءىس استانا قالاسىنىڭ قىلمىستىق ىستەر جونىندەگى اۋدانارالىق سوتىندا قارالۋدا.
