Astanalyq erli-zaıypty aýrýynan aıyqqan balasynyń emine 1,3 mlrd teńge jınap alǵan

Astanada erli-zaıyptylar balalarynyń emine jınalǵan 1,3 mıllıard teńgeni jymqyrdy degen kúdikke ilindi, dep habarlady Qandastar.kz

Bul týraly jýrnalıst Mıhaıl Kozachkov óziniń Telegram-arnasynda málim etti.

Onyń málimetinshe, Dáýlet pen Tolqyn Totaqanovtar aýyr dıagnoz qoıylǵan uldary Áltaıyrǵa ota jasaý úshin qarajat jınaǵan. Emge qajet 50 mıllıon teńge balanyń Instagram paraqshasy arqyly jınalǵan. Alaıda ata-anasy jarnamaǵa aqsha salyp, belsendi túrde qarajat jınaýdy jalǵastyra bergen. Nátıjesinde tórt jyl ishinde olar 350 myńnan astam adamnyń kómegimen 1,3 mıllıard teńgeden astam qarajat jınaǵan.

Jýrnalıstiń aıtýynsha, naqty emdelýge shamamen 6 mıllıon teńge ǵana jumsalǵan, al qalǵan qarajat jeke qajettilikterge – jyljymaıtyn múlik pen avtokólik satyp alýǵa, shetelge saıahattaýǵa jáne qumar oıyndarǵa ketken.

Aqparatty Astana sotynyń baspasóz qyzmeti rastady.

«Erli-zaıyptylary 2020 jyldan 2024 jylǵa deıingi aralyqta Instagram jelisindegi (@altair_tota) paraqsha arqyly balasynyń aýrýyna qatysty jalǵan málimetter men emoııalyq úndeýlerdi paıdalanyp, balany emdeýge dep qaıyrymdylyq qarajat jınaýdy uıymdastyrǵan. Alaıda jınalǵan qarjynyń edáýir bóligi (1,3 mıllıard teńgeden astam) jeke qajettilikterge – qumar oıyndarǵa, brendti kıimderge, saıahattarǵa jáne basqa da maqsattarǵa jumsalǵan», – delingen sot habarlamasynda.

Qazir ata-anaǵa «asa iri kólemdegi alaıaqtyq» jáne «qylmystyq jolmen alynǵan aqshalaı qarajatty zańdastyrý» baptary boıynsha aıyp taǵylyp otyr. Qylmystyq is Astana qalasynyń qylmystyq ister jónindegi aýdanaralyq sotynda qaralýda.