استانالىق كراننان سەكىرمەك بولعان جەرىنەن قۇتقارىلدى

فوتو: Polisia.kz

ەلوردادا پوليتسەي 60 مەترلىك كراننان سەكىرمەك بولعان ەر ادامدى قۇتقارىپ قالدى, دەپ حابارلايدى qandastar.kz

ءتارتىپ ساقشىلارىنىڭ اراسىندا باسىن قاتەرگە تىگىپ, ادامداردىڭ ءومىرىن ساقتاپ قالعان ازاماتتار كوپ. سولاردىڭ ءبىرى – استانا قالاسى پد سارىارقا اۋداندىق جانىندىعى پب جەدەل ۋاكىلى رۋسلان بايبوريەۆ. ول 60 مەترلىك كراننىڭ توبەسىنە شىعىپ, سەكىرمەك بولعان ەر ادامدى قۇتقارىپ قالدى.

رۋسلان تۇنگى ساعات 03:10 شاماسىندا «102» ارناسىنا تۇسكەن قوڭىراۋدان كەيىن وقيعا ورنىنا دەرەۋ جەتىپ, بىردەن باسپالداقپەن جوعارى كوتەرىلىپ, سۋيتسيد جاساماق بولعان جىگىتپەن سويلەسىپ, ونى سابىرعا شاقىردى. سول ساتتە ونىڭ سەنىمىنە كىرىپ, قاۋىپسىز جەرگە ءتۇسىردى.

«مۇنداي جاعدايدا ساقتىق شارالارىن ءبىلۋ وتە ماڭىزدى. مەن ونىمەن تىلدەسىپ, سابىرعا شاقىرۋعا تىرىستىم, ونىڭ ويىن باسقاعا بۇرىپ, ءوزىن جالعىز سەزىنبەۋىنە كومەكتەستىم. ول مەنى تىڭداي باستاعان ساتتە قولىنان ۇستاپ, قۇشاقتاپ, قاۋىپسىز جەرگە ءتۇسىردىم», – دەدى رۋسلان بايبوريەۆ.

پوليتسەي ەر اداممەن سويلەسىپ جاتقان كەزدە وقيعا ورنىنا تجم قىزمەتكەرلەرى دە كەلىپ جەتتى. بىرلەسكەن كۇش-جىگەردىڭ ارقاسىندا ونى قاۋىپسىز جەرگە ءتۇسىردى. جەدەل جاردەم قىزمەتكەرلەرى 35 جاستاعى ازاماتتىڭ دەنساۋلىعىن تەكسەرىپ, ۇيىنە جەتكىزدى. ول بۇل ارەكەتىن ەموتسيانىڭ اسەرىمەن جاساعانىن, سالدارىن ويلاماعانىن مويىنداپ, ءومىرىن ساقتاپ قالعانى ءۇشىن پوليتسيا كاپيتانىنا شىن جۇرەكتەن العىس ايتتى.