استانالىق تۇرعىن باستىعىنىڭ كولىكتەرىن ساتىپ, كيللەر جالداپ ولتىرمەك بولعان

فوتو: ۆيدەودان كادر

استانادا باستىعىنىڭ 18 كولىگىن ساتىپ جىبەرىپ, مۇنى جاسىرۋ ءۇشىن ونىڭ كوزىن جويۋعا تاپسىرىس بەرگەن جىگىت سوتتالسا دا, جابىرلەنۋشىنىڭ مۇلكى وزىنە قايتارىلماعان. سوتتالۋشى ماشينالاردى زاڭسىز جولمەن ارزان باعامەن تانىستارىنا ساتقان كورىنەدى. كەيىن ولار دا ۇستىنە اقشا قوسىپ, كولىكتەر وزگە ادامداردىڭ قولىنا وتكەن. بۇل تۋرالى qandastar.kz اقپارات اگەنتتىگى كتك ارناسىنا سىلتەمە جاساپ حابارلايدى.

مالىمەتتەرگە سەنسەك, سەرگەي ليتۆينتسەۆ استانادا كولىكتەردى جالعا بەرۋمەن اينالىسادى. ول بىلتىر قازان ايىندا ءبىر ولىمنەن امان قالعان. سەنىمگە كىرگەن قول استىنداعى قىزمەتكەر كيللەر جالداپ, ونى ولتىرۋگە تاپسىرىس بەرەدى. ءسويتىپ قىلمىسكەر جابىرلەنۋشىگە تيەسىلى كولىكتەردى زاڭسىز ساتقانىن جاسىرماق بولعان. ول اۆتوپاركتەگى 31 ماشينانىڭ 18-ءىن ءوز تانىستارىنا نارىقتاعىدان ارزان باعاعا ۇسىنىپ ۇلگەرگەن.

سەرگەي ليتۆينتسەۆتىڭ ايتۋىنشا, قىزمەتكەرى جالعان بۇيرىق شىعارىپ, ونىڭ اتىنان سەنىمحات جاساپ العان.

ء«وزى بۇيرىق شىعارىپ, مەنىڭ اتىمنان سەنىمحات جاساپ العان. سوسىن كولىكتەردى ءوز اتىنا اۋدارىپ, وزگە ادامدارعا ساتقان. ءبىز ماشينانى 6-7 ميلليون تەڭگەگە الساق, ول 3-4 ميلليون تەڭگەدەن ساۋدالاعان. ءسويتىپ مەنىڭ كومپانياما تيەسىلى كولىكتەر بىرنەشە ادامعا ساتىلىپ كەتكەن», – دەدى كاسىپكەر.

وكىنىشكە قاراي, كاسىپكەر مۇلكىن قايتارا الماي الەككە تۇسكەن. سوتقا جۇگىنگەنىمەن, وندا ماشينالاردى قازىرگى يەسىنە قالدىرۋ تۋرالى شەشىم شىعارىلىپتى. ال كاسىپكەر ەكونوم-كلاسc كولىكتەردى ساتىپ الۋ ءۇشىن قوماقتى نەسيە العان. ءتىپتى ءۇيىن دە كەپىلگە قويىپتى.

«كولىكتەردىڭ ءبىر بولىگىن ءوز اقشاما, قالعانىن نەسيەگە العانمىن. اي سايىن 1 ميلليون 400 مىڭ تەڭگە تولەم جاساپ وتىرمىن. ءۇيىمىز دە كەپىلدە تۇر. وسى جاعدايدىڭ كەسىرىنەن بانكروتتىڭ الدىندا تۇرمىز», – دەدى سەرگەي ليتۆينتسەۆ.

ايتا كەتەيىك, قىلمىس بىلتىر قازان ايىندا اشكەرەلەنگەن. كاسىپكەر ءوزىن ءولتىرۋدى جوسپارلاپ جاتقانىن ەستىپ پوليتسەيلەرگە حابار بەرگەن. ءسويتىپ تاپسىرىس بەرۋشى مەن كيللەر قىلمىس ۇستىندە قۇرىقتالدى. ولاردىڭ ءبىرى 12 جىلعا, ەكىنشىسى 10 جىلعا سوتتالعان.

ال زاڭسىز ساتىلعان كولىكتەردىڭ ءىسى بولەك قارالىپتى. وندا ماشينالاردى ساتۋ جونىندەگى باستاپقى كەلىسىمدەر زاڭسىز دەپ تانىلعانىمەن, كەيىنگى ساتىپ الۋشىلاردىڭ ەش كىناسى جوعى دالەلدەنگەن.

استانا قالاسىنىڭ ازاماتتىق ىستەر جونىندەگى اۋدانارالىق سوتى بۇل جاعدايدا جاۋاپكەرلەر قىلمىسكەردىڭ ارام پيعىلى تۋرالى بىلمەگەنىن ايتادى.

«جاۋاپكەرلەر قىلمىسكەردىڭ ارام پيعىلى تۋرالى بىلمەگەن. ولار كولىكتى ساتىپ الماس بۇرىن ابدەن تەكسەرگەن, قۇجاتتارىن زەرتتەگەن, م ۇلىكتىڭ كەپىلدە تۇرماعانىنا كوز جەتكىزگەن. ولار قازىر كولىكتىڭ زاڭدى يەلەرى. تالاپكەر كەيىنگى ساتىپ الۋشىلاردىڭ اۆتوكولىكتەردى زاڭسىز يەمدەنگەنى تۋرالى دالەلدەر ۇسىنعان جوق», – دەدى استانا قالاسىنىڭ ازاماتتىق ىستەر جونىندەگى اۋدانارالىق سوتى.

ال ءوز كومپانياسىنا تيەسىلى كولىكتەردىڭ ساتىلۋىنا ەشقانداي كەلىسىم بەرمەگەن كاسىپكەر سوت شەشىمىمەن مۇلدەم كەلىسپەيدى. ونىڭ ەندىگى ءۇمىتى — اپەللياتسيالىق سوت. كاسىپكەر ادىلدىك ورناپ, 18 ماشينا وزىمە قايتارىلسا دەيدى. وعان كەلگەن جالپى شىعىن 80 ميلليون تەڭگە.

ەسكە سالايىق, بۇعان دەيىن باتىسقازاقستاندىق پوليتسەيلەر جەدەل ءىس-شارالار بارىسىندا باتىس قازاقستان وبلىسىندا پوليتسيا تاپسىرىسپەن كىسى ولتىرمەك بولعان ادامنىڭ جولىن كەستى. قىلمىستى ۇيىمداستىردى دەگەن كۇدىكپەن وبلىستىڭ ەكى تۇرعىنى ۇستالدى. ال تاپسىرىس بەرۋشى كۇيەۋىمەن م ۇلىكتى بولىسكىسى كەلمەگەن ايەل ەكەن. ​كۇدىكتىلەردەن ولاردىڭ كىناسىن راستايتىن زاتتاي دالەلدەر تاركىلەندى.