استانالىقتار اكىمنەن جۇمىس كەستەسىن ءبىر ساعاتقا كەيىنگە شەگەرۋىن سۇرادى

فوتو: اشىق دەرەككوز

استانا تۇرعىندارى قالا اكىمى  جەڭىس قاسىمبەكتەن ەلوردالىقتاردىڭ جۇمىس كەستەسىن بۇرىنعى ۋاقىت بەلدەۋىنە اۋىستىرۋدى سۇرادى. قالا باسشىسى استانالىقتارمەن كەزدەسىپ, ولاردىڭ مۇڭ-مۇقتاجىن تىڭدادى. بۇل تۋرالى qandastar.kz  اقپارات اگەنتتىگى كتك ارناسىنا سىلتەمە جاساپ حابارلايدى.

ۇكىمەتتىڭ بۇرىنعى ۋاقىت بەلدەۋىن قايتارمايتىنىن تۇسىنگەن استانالىقتار اكىمنەن تىم بولماسا جۇمىس كەستەسىن ءبىر ساعاتقا شەگەرۋىن سۇرادى.

“بۇرىنعى ۋاقىت بەلدەۋىن كەرى قايتارا المايمىز. بىراق اكىم رەتىندە جۇمىس كەستەسىن ءبىر ساعاتقا اۋىستىرا الاسىز با? بالالار كەش كەلەدى, كەشكى 17:00-دە قاراڭعى تۇسەدى. سوندىقتان جۇمىس ۋاقىتى ەرتەرەك باستالسا”, – دەپ ءوتىنىش جاسادى ەلوردا تۇرعىندارى.

قالا اكىمى بۇل ماسەلەنى كوپ بولىپ اقىلداسۋ كەرەگىن ايتتى.

“مۇنى ادامدارمەن تالقىلاۋ كەرەك. سىزدەردىڭ بۇل ۇسىنىستارىڭىز بىرەۋگە ۇناماۋى مۇمكىن. مەن وعان سەنىمدىمىن. بارىنە ۇنايتىن شەشىم قابىلداۋ مۇمكىن ەمەس”, – دەپ جاۋاپ بەردى جەڭىس قاسىمبەك.

بۇعان دەيىن ۋاقىت بەلدەۋىنىڭ قازاقستاندىقتاردىڭ جاعدايىنا اسەرىن انىقتايتىن مونيتورينگتىك توپ قۇرىلعانى تۋرالى جازعان ەدى.