استانانىڭ اينالاسىنا بلوكپوستتار ورناتىلدى

فوتو: Instagram/police__astana

شانحاي ىنتىماقتاستىق ۇيىمى ءسامميتىنىڭ وتۋىنە بايلانىستى ەلوردادا بلوك- پوستتار قويىلدى. بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ ايتتى.

«ەلىمىزدە, ەلوردادا گەوساياسي تۇرعىدا زور ماڭىزى بار وتە اۋقىمدى ساياسي ءىس-شارا وتەتىندىگىنە بايلانىستى قازىرگى ۋاقىتتا پوليتسيا كۇشەيتىلگەن جۇمىس رەجيمىنە كوشىرىلدى», – دەدى ول سەناتتىڭ جالپى وتىرىسى اياسىندا باق وكىلدەرىنىڭ ساۋالىنا وراي.

سونىمەن قاتار ءمينيستردىڭ ءبىرىنشى ورىنباسارى ەلوردا توڭىرەگىنە بلوك-پوستتار ورناتىلعانىن ايتتى. بىراق ولاردىڭ سانىن ايتۋدان باس تارتتى. سونداي-اق, شاھارداعى ءدىني نىساندار باقىلاۋعا الىندى. 

«سوندىقتان دا مۇنداي شارالار قولدانىلادى. بۇل – قازاقستان تاپقان دۇنيە ەمەس, حالىقارالىق تاجىريبە. ءبىز مۇنىڭ ءبارىن ەڭ الدىمەن حالىقتىڭ قاۋىپسىزدىگى ءۇشىن جاسايمىز. مارتەبەلى مەيماندار, ۇلكەن دەلەگاتسيا كەلەتىندىگىنە بايلانىستى الدىن الا ەسكەرتەمىز. ستراتەگيالىق مەكەمەلەر كۇزەتكە الىنعان. كورشى مەملەكەتتەردە بولعان وقيعالارعا بايلانىستى جاساقتارىمىزدى ءدىني جانە وزگە دە نىساندارعا جاقىنداتتىق», – دەدى مارات قوجاەۆ.