استانانىڭ باس يمامىنا قاتىستى اقپارات ەلدى دۇرلىكتىردى

فوتو: سكرين

TikTok جەلىسىندە ەلوردانىڭ باس يمامىنىڭ ءۇيى دەپ تۇسىرىلگەن ۆيدەو تارادى. دەگەنمەن ءدىن وكىلى بۇل اقپاراتتى جوققا شىعاردى, دەپ جازادى qandastar.kz

عالامتوردا تاراعان ۆيدەونىڭ اۆتورى باستاپقىدا ءۇيدى مەشىت دەپ ويلاعانىن ايتتى. كادرلاردا توبەسى كۇمبەز پىشىندە جاسالعان ءزاۋلىم سارايدى كورۋگە بولادى.

«استانا قالاسى باس يمامىنىڭ ءۇيى ەكەن. ال ەندى ساداقا بەرىڭدەر. ءار جۇما سايىن سالعان ساداقالارىڭ قايدا كەتىپ جاتىر? قالتاعا كەتىپ جاتىر ءبارى. نە دەگەن ساراي مىناۋ!? ءتورت ايەلى جانە جەكە اسپازى بار ەكەن. سەندەردىڭ ساداقالارىڭمەن جالاقىسىن تولەيدى. مىنانىڭ ارعى جاعىن كورسەڭ, 1 گەكتار جەردى قورشاپ العان», – دەدى ۆيدەو اۆتورى.

الايدا استانا قالاسىنىڭ باس يمامى ەربولات ءجۇسىپوۆ بۇل اقپاراتتى جوققا شىعاردى. مۇنى ول ءدىننىڭ اينالاسىندا جۇرگەن ازاماتتارعا كۇيە جاعۋ دەپ اتادى.

«قازىر الەۋمەتتىك جەلىدە يسلام دىنىنە جانە ءدىننىڭ اينالاسىندا جۇرگەن ازاماتتارعا كۇيە جاعۋ ماسەلەسى بەلەڭ الدى. ونداي ادامدار تىم شەكتەن شىقتى دەپ ايتۋعا بولادى. ەڭ اۋەلى اللا ولارعا حيدايات بەرسىن دەيمىز. Facebook, TikTok الەۋمەتتىك جەلىسىندە بەلگىسىز ءبىر ازامات جالعان اككاۋنت ارقىلى «مىناۋ تۇرعان ءزاۋلىم ءۇي استانا قالاسىنىڭ باس يمامىنىڭ ءۇيى» دەگەن مازمۇندا ۆيدەو بولىسكەن. بۇل مۇلدەم شىندىققا جاناسپايتىن وتىرىك اقپارات ەكەنىن قاپەرلەرىڭىزگە سالامىن», – دەدى ول.

سونداي-اق ول كوپشىلىكتى ارانداتۋشىلاردىڭ وسەك-اياڭىنا سەنبەۋگە شاقىردى.

«اللا ەلشىسى: «سەندەردىڭ ارالارىڭداعى اللا تاعالاعا ەڭ جەك كورىنىشتىلەرىڭ وسەك تاراتىپ, ادامدار اراسىنا ىرىتكى سالىپ, الاۋىزدىققا اپاراتىندارىڭ», – دەگەن. ارداقتى مۇسىلمان قاۋىم, ارانداتۋشىلاردىڭ وسەك-اياڭىنان بارشامىزدى ساقتاسىن. مەن, ەربولات ءجۇسىپوۆ استانا قالاسىنىڭ باس يمامى رەتىندە بەينە ماتەريالدا تاراعان اقپاراتتىڭ شىندىققا جاناسپايتىنىن مالىمدەيمىن», – دەدى ول.