Astananyń eki turǵyny esirtki quraldaryn poshtamen taratqan

Foto:  ashyq derekkóz

Astananyń eki turǵyny esirtki quraldaryn taratqany úshin 8 jáne 18 jylǵa deıin bas bostandyǵynan aıyryldy. Bul týraly QMA resmı ókili Álibek Ábdilov málim etti, dep habarlady qandastar.kz

Agenttiktiń elordadaǵy departamenti AQSh-tan esirtki jáne psıhotroptyq zattardy halyq tutynatyn taýarlary bar poshta sálemdemeleri túrinde asa iri mólsherde jetkizý faktisin áshkereledi.

Máselen, qyzmettik-izdestirý ıtin qoldana otyryp, tekserý júrgizý kezinde kedendik baqylaý aımaǵyndaǵy ýaqytsha saqtaý qoımasynda jalpy salmaǵy shamamen 1 kg bolatyn «gashısh» esirtki zaty tabylyp, tárkilendi.

— Sonymen qatar, sotqa deıingi tergeý barysynda júrgizilgen monıtorıng nátıjeleri «Qazposhta» AQ qalalyq fılıaldarynyń birinde sol alýshylardyń atyna taǵy bir sálemdemeniń bar ekendigin kórsetti. Sálemdemede jalpy salmaǵy 7 gramnan asatyn kúshti psıhotropty zat — tetragıdrokannabınol jáne onyń ızomerleri tabyldy. Aıyptalýshylardyń biriniń páterin tintý kezinde esirtki quraldary, sondaı-aq oraýysh materıaldar men tarazy tabyldy. Sot sheshimimen istiń eki qatysýshysy kináli dep tanylyp, ortasha qaýipsizdik kolonııasynda jazasyn óteı otyryp, 8 jáne 18 jyl merzimge bas bostandyǵynan aıyryldy, — dedi QMA resmı ókili Álibek Ábdilov.

Jalpy, jyl basynan beri esirtki kontrabandasy jáne zańsyz aınalymy faktileri boıynsha 116 qylmystyq is tirkelgen. 57,3 kg esirtki tárkilendi.

Sonymen qatar, 1,7 kg psıhotroptyq zattar, anabolıkter (ýly zat) — 206 myń dana jáne «Tropıkamıd» kóz tamshylary — 1 680 dana tárkilendi.