اسىق ويناعان وزار

اسىق ويىنى – بالانى جاستايىنان وي-قابىلەتىن شىڭداپ, دالدىككە, ەپتىلىككە تاربيەلەگەن. بۇل ەرتەدەن كەلە جاتقان ويىن ءتۇرى. كوشە-كوشەدە شۋلاسىپ, شۇبىرىپ وينايتىن اسىق ويىنى بۇگىندە قايتا جاڭعىرىپ ءوز الدىنا سپورت ءتۇرى بولىپ قالىپتاستى.

ەلدە اسىق اتۋدان كوپتەگەن جارىس ۇيىمداستىرىلىپ, كاسىبي ماشىقتانعان ازاماتتاردىڭ دا قاتارى كوبەيدى. 7 جىلدان بەرى اسىق ءيىرىپ جۇرگەندەردىڭ ءبىرى ەلوردالىق ايبەك امانگەلدى. ونىڭ بۇل سپورتقا كەلۋى دە قىزىق. اسىقشى ناۋرىز مەيرام قارساڭىندا قالا كوشەلەرىندە اسىق ويناپ ءجۇرىپ مەرگەندىگىمەن قالا باپكەرلەرىنىڭ كوزىنە تۇسكەن. سودان بەرى اسىق اتۋمەن تۇراقتى تۇردە اينالىسىپ, قازىرگى تاڭدا ۇلتتىق قۇراما نامىسىن قورعاپ كەلەدى. ايبەك امانگەلدى, اسىق اتۋدان ۇلتتىق قۇراما مۇشەسى: – ەڭ ءبىرىنشى مەشىتتە ويناپ كوزگە تۇسكەم.

سول كەزدە ەسكەندىر راحمەتوۆ شاقىردى. سودان باستاپ مىنە 7 جىل بولىپتى ويناپ جۇرگەنىمە. وزىمە ۇنايدى. بالا كەزدە ويناعانمىن. ەپتىلىككە تاربيەلەيدى, كوزدى جاقسارتادى. مىسالى جاتتىعۋعا كەلەمىز وينايمىز, دەنەمىز قىزادى, دەنەمىز سوزىلادى. وزىمىزگە جاقسى موتوريكامىز ويانادى. كوز, قول, جۇگىرەمىز دەنساۋلىققا پايدالى. ايبەك بەس تابان ويىنىنان قر كۋبوگىنىڭ 2 دۇركىن جەڭىمپازى, 2 مارتە قازاقستان چەمپيونى, رەسپۋبليكالىق كەيكى مەرگەن تۋرنيرىندە دە قارسىلاس شاق كەلتىرمەي تۇعىردىڭ العاشقى ساتىسىنان كورىنگەن. بەس تابان ويىنى كورەر كوزگە وڭاي بولىپ كورىنگەنمەن وزىندىك قيىنشىلىقتارى بار.

اسىق اتۋدان قالالىق فەدەراتسيا پرەزيدەنتى ەسكەندىر راحمەتوۆتىڭ ايتۋىنشا بەس تابان ويىنى شيراقتىلىققا, ۇستامدىلىققا, العىرلىققا, قارسىلاسىنا دەگەن سىيلاستىققا تاربيەلەيدى. ەكى ادام 3 تايمنان ويىن وتكىزگەندە 7-8 شاقىرىم جەردى جۇگىرىپ وتكەندەي بولادى دەيدى. ەسكەندىر راحمەتوۆ, استانا قالاسىنىڭ «اسىق ويىنى» فەدەراتسياسى پرەزيدەنتى: – ەكى جىگىت 15 مينۋتتان ەكى تايم وينايدى. ال تەڭ بوپ قالعان جاعدايدا 3-ءشى 15 كەتەدى. ياعني 45 مينۋتتا 2 جىگىت 7-8 شاقىرىمدى ءجۇرىپ تاستايدى. ونىڭ ىشىندە قولدى سەرمەپ ۇرادى. ەسەپ تەڭ بولعان كەزدە 6 دا 6 بولعان كەزدە قوبالجيدى. سول قوبالجۋدى جەڭگەن ادام جەڭىسكە جەتەدى. ولار مەرگەن ويىنشىلار. ايبەك امانگەلدىنىڭ ەندىگى ماقساتى كۇزدە وتەتىن كوشپەندىلەر ويىندارىنىنىڭ قاتىسۋشىلار قۇرامىنا ەنىپ, كوك تۋىمىزدى جەلبىرەتۋ. بايراقتى باسەكەدە قازاقتىڭ بەس تابان جانە بەس اسىق ويىندارىنان 1 مەدال جيىنتىعى, قىرعىزدىڭ وردو ويىنىنان 1 مەدال جيىنتىعى ساراپقا سالىنادى.

جومارت ورازوۆ – قر اسىق اتۋ سپورتىنان مەملەكەتتىك جاتتىقتىرۋشى: – 5-ءشى كوشپەندىلەر ويىندارىنا اسىق اتۋدان قازاقستان قۇراما كومانداسى دايىندىقتى باستاپ كەتتى. اقپان ايىندا 1 وقۋ جاتتىعۋ جيىندارى ءوتتى, الماتى قالاسىندا. ارى قاراي بىزدە بۋرابايدا, تۇركىستان وبلىسىندا, قىرعىزستاندا شولپان اتادا, سوڭعى وقۋ جاتتىعۋ جيىندارىمىز استانا قالاسىندا جوسپارلانعان. ءبارى جوسپار بويىنشا باستالدى. دايىندىق جامان ەمەس قازىر. ۇلتتىق قۇرامىنىڭ ىشىنەن ىرىكتەلىنىپ الىنادى, كىمنىڭ دايىندىعى جاقسى, كىم دايىندىعى مىقتى. سول وينايتىن بولادى. كوشپەندىلەر ويىندارىنىڭ باعدارلاماسىندا 20 سپورت ءتۇرى بار.

اسىق اتۋ قازاقتىڭ قانىنا سىڭگەن ونەر بولعاندىقتان, وزگە سپورت تۇرلەرىنە قاراعاندا ءباسى بيىك, التىنعا ءۇمىتتى سپورت ءتۇرى. التىننىڭ جولىندا اسىقشىلارىمىز ايانباي ەڭبەك ەتۋدە. وعان بىزدە كۋامىز, سىزدە كۋاسىز