اتا-اناسى بالاسىمەن 33 جىلدان كەيىن قايتا كەزدەستى

اكەسى 2023 جىلى قايتىس بولعاننان كەيىن عانا اسىراپ العان انا ۇلىنا ونىڭ ءوز بالاسى ەمەس ەكەنىن ايتقان.

قىتايلىق ەرلى-زايىپتىلار اۋرۋحانا ديرەكتورىنىڭ بەدەۋ تۋىسى وسىرگەن «ولگەن» ۇلىن 33 جىلدان كەيىن ءتىرى تاپقاندا تاڭ قالدى, دەپ حابارلايدى inbusiness.kz سايتى South China Morning Post-قا سىلتەمە جاساپ.

قىتايدا ۇلدارى تۋعاننان كەيىن كوپ ۇزاماي قايتىس بولدى دەپ سەنگەن ەرلى-زايىپتىلار ونىڭ شىن مانىندە ءتىرى جانە جاعدايى جاقسى ەكەنىن 30 جىلدان استام ۋاقىت وتكەن سوڭ ءبىلدى.

قىتايدىڭ شىعىسىنداعى انحوي پروۆينتسياسىنداعى كەدەي كەنتتە وسكەن 33 جاستاعى چجان حۋايۋان ءوزىن اسىراپ العانىن ەستىگەندە قاتتى تاڭ قالدى. ول ءوزىنىڭ بيولوگيالىق اتا-اناسى قىتايدىڭ وڭتۇستىك-شىعىسىنداعى چجەتسزيان پروۆينتسياسىنىڭ باي ساۋداگەرلەرى ەكەنىن ءبىلدى. ول بيولوگيالىق اتا-اناسىنان 400 شاقىرىمداي جەردە وسكەن.

بوسانعاننان كەيىن دارىگەرلەر چجاننىڭ بيولوگيالىق اتا-اناسىنا ونىڭ شالا تۋىلعاندىقتان شەتىنەپ كەتكەنىن ايتتى. بىراق, شىن مانىندە نارەستە اۋرۋحانا ديرەكتورىنىڭ جۇكتى بولا الماعان تۋىسقانىنا بەرىلگەن. اسىراپ الۋشىلاردىڭ جاسى 50-دەن اسقان. ونىڭ اكەسى مۇگەدەك بولدى, سوندىقتان چجان قارجىدان قىسىلىپ, 17 جاسىندا مەكتەپتى تاستاپ كەتۋگە ءماجبۇر بولدى. اكەسى 2023 جىلى قايتىس بولعاننان كەيىن عانا اسىراپ العان انا ۇلىنا ونىڭ ءوز بالاسى ەمەس ەكەنىن ايتقان.

چجان شىن اتا-اناسىمەن وسى جىلدىڭ مامىر ايىندا پوليتسيانىڭ كومەگىمەن كەزدەستى. لي وتباسى قىتايدىڭ شىعىسىنداعى تيانتسزين قالاسىنداعى چجاننىڭ ۇيىنە بارىپ, كەلىنى مەن توعىز جاسار نەمەرەسىن كوردى.

20 مامىردا چجەتسزياندا وتكەن ۇلكەن مەرەكەدە چجاننىڭ بيولوگيالىق اكەسى لي شيتسزە كوزىنە جاس الىپ, بالاسىنا 1,2 ملن يۋان (166 مىڭ دوللار) شوت اشۋ ءۇشىن بانك كارتاسىن سىيعا تارتتى.

چجان كەدەيلىكتە وسكەنىمەن بيولوگيالىق اتا-اناسىنىڭ ىسكەرلىك داعدىلارىن مۇرا ەتتى – ونىڭ شاعىن فابريكاسى بار ەدى.