اتاۋلى الەۋمەتتىك كومەك تولەۋدىڭ جاڭا شارتتارى قانداي

قازاقپارات – بۇگىن ۇكىمەت وتىرىسىندا قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ اتاۋلى الەۋمەتتىك كومەك تولەۋدىڭ نەگىزگى تەتىكتەرىن اتادى.
«اتاۋلى الەۋمەتتىك كومەك ومىرلىك قيىن جاعدايعا تاپ بولعان جانە ودان ءوز بەتىنشە شىعۋعا مۇمكىندىگى جوق ادامدارعا عانا تاعايىندالۋى ءتيىس. وسىعان بايلانىستى كەلەسى نەگىزگى تەتىكتەر ۇسىنىلادى. بىرىنشىدەن, ااك-ءتىڭ توقسان سايىن تاعايىندالۋىن قايتارۋ جانە تيىسىنشە, شارتتى جانە شارتسىز كومەكتى ءۇش ايعا تاعايىنداۋ», – دەدى ول.
ءمينيستردىڭ ايتۋىنشا, بۇل ءبىر جاعىنان ااك الۋشىلاردىڭ ءوز تابىسىن جاسىرۋ جاعدايلارىن بارىنشا تومەندەتەدى. ەكىنشى جاعىنان – كومەكتى تاعايىنداۋ ءتارتىبى ءادىل بولادى.
«سەبەبى وتباسىنىڭ جان باسىنا شاققانداعى تابىسى كەلەسى توقساندا كوبىنە ازايۋ جاعىنا وزگەرىپ جاتادى. ياعني, ااك-ءتى توقسان سايىن ەسەپتەگەندە تاعايىندالعان مولشەرى ۇلعايۋى مۇمكىن. ەكىنشىدەن, بارلىق وتباسى مۇشەلەرىنە ااك ورتا تابىسى مەن كەدەيشىلىك شەگى اراسىنداعى ايىرماشىلىق كولەمىندە تولەنەتىن بولادى. ۇشىنشىدەن, ەگەر وتباسىنىڭ ەڭبەككە قابىلەتتى مۇشەسى ۇسىنىلعان جۇمىسپەن قامتۋ شارالارىنان باس تارتسا, وندا ول جانە ونىڭ وتباسىنىڭ بارلىق مۇشەلەرى ااك الۋ قۇقىعىنان ايىرىلادى. سونىمەن قاتار بالا كۇتىمىمەن اينالىساتىن اناعا بالا ءۇش جاسقا تولعاننان كەيىن جۇمىسپەن قامتۋدىڭ بەلسەندى شارالارىنا قاتىسۋ قۇقىعىن بەرۋ ۇسىنىلادى», – دەدى مينيستر.

ب.نۇرىمبەتوۆ تورتىنشىدەن, ۋچاسكەلىك كوميسسيالار جۇمىسى كۇشەيتىلەتىندىگىن ايتتى.
«وكىنىشكە قاراي, اتاۋلى الەۋمەتتىك كومەك الۋشىلار بىرنەشە قاباتتى جەكە ۇيلەردە تۇرىپ جاتقان, بىرنەشە اۆتوكولىگى بولعان, جەر ۋچاسكەلەرى مەن قوسالقى شارۋاشىلىقتارىنىڭ ۇلكەن كولەمدە بولعان مىسالدار از ەمەس. بۇل جاعدايلار ۋچاسكەلىك كوميسسيانىڭ جاۋاپكەرشىلىگىندە. سوندىقتان زاڭ جوباسىندا ۋچاسكەلىك كوميسسيالار ءۇشىن اتاۋلى الەۋمەتتىك كومەككە مۇقتاجدىعىن انىقتاۋ ولشەم شارتتارىن بەكىتۋ ءۇشىن ورتالىق اتقارۋشى ورگاننىڭ قۇزىرەتىن قاراۋ ۇسىنىلادى», – دەدى ول.
وسى ورايدا مينيستر اتاۋلى الەۋمەتتىك كومەككە ۇمىتكەر وتباسىلاردىڭ سانىنىڭ ارتۋى قوعامدىق نەگىزدە جۇمىس ىستەيتىن ۋچاسكەلىك كوميسسيالاردىڭ جۇمىسىنا اسەر ەتكەنىن مويىندادى.
«سوندىقتان ءبىز زاڭدا ۋچاسكەلىك كوميسسيالارعا وتباسىنىڭ ماتەريالدىق جاعدايىنا قورىتىندى جاساۋ ءۇشىن مەرزىمدى ءۇش كۇننەن جەتى كۇنگە دەيىن ارتتىرۋدى ۇسىنامىز», – دەدى ب.نۇرىمبەتوۆ.
ەسكە سالايىق, قر ەڭبەك جانە حالىقتى الەۋمەتتىك قورعاۋ ءمينيسترى بۇگىن ۇكىمەت وتىرىسىندا اتاۋلى الەۋمەتتىك كومەكتى بەرۋدىڭ قولدانىستاعى جۇيەسىن وزگەرتەتىن زاڭ جوباسىن تانىستىردى.
باستى باعىت – ەڭبەككە ىنتالاندىرۋ, ازاماتتاردىڭ تابىستارىن جانە مەملەكەتتىك قولداۋ مولشەرىن ەسەپكە الۋعا قاتىستى اشىقتىق پەن ادىلەتتىكتى قامتاماسىز ەتۋ.
جاڭا زاڭ جوباسىندا كوپبالالى وتباسىلارعا مەملەكەتتىك جاردەماقىنى تابىسىنا قاراماستان تولەۋ ۇسىنىلىپ وتىر. ول بالالاردىڭ سانىنا قاراي 42500 تەڭگەدەن 73 مىڭ تەڭگەگە دەيىن سارالانعان مولشەردە بەرىلەدى.