جاڭالىقتار
اتباسار تۇرمەسىندەگى ازاپتاۋ ءىسى: القابيلەردىڭ اقتاۋ ۇكىمى جويىلدى
فوتو: چاتدجيپيتي
اتباسار قالاسىنداعى كولونيادا سوتتالعاندارعا جاسالعان ازاپتاۋ ءىسى بويىنشا شىعارىلعان القابيلەردىڭ اقتاۋ ۇكىمى جويىلدى, دەپ جازدى qandastar.kz
بۇل تۋرالى 11 ءساۋىر كۇنى اقمولا وبلىستىق سوتى حابارلادى, دەپ حابارلايدى Dalanews.kz.
سوت ۇكىمى نەگە جويىلدى?
سوتتىڭ مالىمەتىنشە, اتباسار اۋداندىق قىلمىستىق-اتقارۋ جۇيەسى مەكەمەسىنىڭ 12 قىزمەتكەرى قىلمىستىق كودەكستىڭ 146-بابى 3-ءبولىمى 1-تارماعى بويىنشا («ازاپتاۋ») ايىپتالعان. الايدا القابيلەر ولاردى قىلمىس قۇرامى جوق دەپ تاۋىپ, اقتاپ شىققان بولاتىن. وبلىستىق سوتتىڭ قىلمىستىق ىستەر جونىندەگى سوت القاسى بۇل شەشىمدى جويدى. سەبەبى ءبىرىنشى ينستانتسيا سوتىنىڭ جۇمىسىندا بىرقاتار زاڭبۇزۋشىلىقتار انىقتالعان.
بىرىنشىدەن, سوت القابيلەر قاتىسپاۋى ءتيىس ماسەلەلەردى ولاردىڭ كوزىنشە قاراستىرعان. ەكىنشىدەن, كەيبىر جابىرلەنۋشىلەرگە سوت جارىسسوزدەرىنە قاتىسۋ مۇمكىندىگى بەرىلمەگەن.
ءىس قايتا قارالادى
ەندى بۇل ءىس سول سوتتا, بىراق باسقا قۇراممەن قايتا قارالاتىن بولدى.
ءىس قالاي باستالدى?
اتباسار تۇرمەسىنىڭ قىزمەتكەرلەرىنە قاتىستى قىلمىستىق ءىس 2024 جىلدىڭ شىلدەسىندە باستالعان. بۇعان سەبەپ — ينتەرنەتتە سوتتالعانداردى ۇرىپ-سوققان ۆيدەولاردىڭ تارالۋى ەدى. ءىس جابىق رەجيمدە قارالدى. جابىرلەنۋشى دەپ تانىلعاندار سانى — 41 ادام. ولاردىڭ قاتارىندا قوعام بەلسەندىسى تيمۋر دانەباەۆ تا بار. ول سوتتا ازاپتاۋ مەن قورلاۋ ارەكەتتەرى تۋرالى جان-جاقتى مالىمەت بەرگەن. ونىڭ ايتۋىنشا, جازاسىن وتەۋ بارىسىندا كەمىندە 20 رەت قاتىگەزدىككە تاپ بولعان.
قىزمەتتەن بوساتىلعاندار مەن پرەزيدەنتكە ۇندەۋ
وسى داۋلى وقيعادان كەيىن قاجك-نىڭ 11 قىزمەتكەرى جۇمىستان قۋىلدى. ولار پرەزيدەنتكە بەينەۇندەۋ جولداپ, ءوز ارەكەتتەرىن زاڭ اياسىندا, ياعني «سوتتالعانداردىڭ جاپپاي باعىنباۋىن توقتاتۋ» ءۇشىن جاساعاندارىن مالىمدەگەن.
