الەۋمەت جانە قوعامجاڭالىقتار
اتىراۋ وبلىسىندا بەلگىسىز درونعا ۇقساس بولشەكتەر تابىلدى
كورنەكى فوتو: اشىق دەرەككوزدەن
اتىراۋ وبلىسىنىڭ قۇرمانعازى اۋدانىندا تاعى دا ۇشقىشسىز ۇشۋ اپپاراتىنا تيەسىلى بولشەكتەر تابىلدى, دەپ حابارلايدى Qandastar.kz.
فراگمەنتتەر شەكاراعا جاقىن, دالالىق جەردە تابىلعان.
اتىراۋ وبلىسى پوليتسيا دەپارتامەنتىنىڭ حابارلاۋىنشا, تابىلعان زات بويىنشا تەكسەرۋ جۇمىستارى باستالعان.
«قۇزىرلى ورگاندارمەن بىرلەسە وتىرىپ, سىرتقى كەلبەتى درون بولشەكتەرىنە ۇقسايتىن وبەكتىگە قاتىستى تەكسەرۋ شارالارى جۇرگىزىلۋدە. وبەكت دالا ايماعىنان تابىلدى. زالال مەن زارداپ شەككەندەر جوق. بارلىق دەرەكتەر مەن ءمان-جايلار انىقتالىپ جاتىر», — دەلىنگەن حابارلامادا.
ايتا كەتەيىك, بۇل وڭىردەگى ءبىرىنشى رەت بولىپ وتىرعان جاعداي ەمەس. 22 ماۋسىمدا قونىرتەرەك اۋىلى ماڭىندا دا ۇشاتىن اپپاراتقا ۇقسايتىن بەلگىسىز زات تابىلعان بولاتىن. ول كەزدە وبلىستىق اكىمدىك وقيعا ورنىنا ارنايى كوميسسيا جىبەرىلگەنىن حابارلادى.
