اتىراۋدا اققۋلار قىرىلىپ جاتىر

فوتو: adyrna.kz

اتىراۋدا قۇستار جاپپاي قىرىلىپ جاتىر. كوبى اققۋلار. اينالاسى ەكى كۇندە ماماندار 60-قا جۋىق قاناتتىنىڭ ولەكسەسىن جيناعان, دەپ حابارلايدى Almaty.tv تىلشىسى.

اتىراۋدا جاڭبىردان كەيىن شىققان ساڭىراۋقۇلاقتاي جەر-جەردە قۇستاردىڭ ولەكسەلەرى شاشىلىپ جاتىر. ءسال ەرتەرەكتە الەۋمەتتىك جەلىدە كەڭ تاراعان بەينەجازبادان شامامەن 40-50 شاقتى قۇستىڭ بىرنەشە ءتۇرىن كورۋگە بولادى. اراسىندا سيرەك كەزدەسەتىندەرى دە بار. وقيعا قالاداعى «ساسىق ساي» بۋلانۋ الاڭىندا بولعان. قازىر ارنايى قۇرىلعان كوميسسيا قاناتتىلاردىڭ قىرىلۋىنا قاتىستى ءمان-جايدى انىقتاۋعا كىرىستى.

– كەشە ساناعانىمدا 55 دانا ولەكسە, ونىڭ جەتەۋى اققۋ بولدى. جۇرگەن جولىمىزدى قاراپ كەلە جاتىرمىز, جوق, الىپ كەتكەن سياقتى, – دەدى وبلىستىق ورمان شارۋاشىلىعى ينسپەكتسياسى ءبولىمىنىڭ باس مامانى مەرەكە شالقاروۆ.

ماماندار ولەكسەلەردى جيناپ جاتىر. سۋ ايدىنىنان تابىلعانداردىڭ ىشىندە اققۋ دا بار.

ايتا كەتەيىك, بۇرىن اتىراۋدا مۇنداي جاعداي بولماعان. ءتىپتى سۋ قۇرامىنان زياندى قالدىق تا انىقتالماعان.

– سۋدىڭ قۇرامىندا مۇنايدىڭ كورسەتكىشى 1,8 ميلليگرامم بولۋى كەرەك. ال بىزدە 0,4-0,3 مگ كورسەتىپ تۇر, سۋ تازا, – دەدى «اتىراۋ مۇناي وڭدەۋ زاۋىتى» جشس قورشاعان ورتانى قورعاۋ ءبولىمىنىڭ باستىعى نۇرلان ەششانوۆ.

ازىرگە قۇستاردىڭ جاپپاي قىرىلۋىنا نەنىڭ سەبەپ بولعانى بەلگىسىز. ولاردان ءتيىستى سىنامالار الىندى. بۇعان دەيىن ماحامبەت اۋدانىنا قاراستى كانالدا دا ءولى بالىقتار تابىلعان. ولەكسەلەر ءتىپتى 80 كەلىگە جەتكەن. وسىنىڭ بارىنەن قاۋىپتەنگەن جەرگىلىكتى بيلىك ارناعا قۇياتىن سۋدىڭ كولەمىن ارتتىرماق.

– نەگە كولەمىن ۇلكەيتىپ جاتىرمىز? سۋ كوبەيسە, اعىس كۇشەيەدى. اعىس كۇشەيگەندە بالىققا قاجەتتى وتتەگى پايدا بولادى. بالىقتىڭ ءبارى جايىق وزەنىنە جىبەرىلەدى, – دەدى «جايىق-كاسپي» وبلىسارالىق باسسەيندىك بالىق شارۋاشىلىعى ينسپەكتسياسىنىڭ باسشىسى نۇرلىبەك گايسين.

اقپار ءۇشىن ايتايىق, وڭىردەگى اپاتتى جاعدايدىڭ الدىن الۋ ءۇشىن جۇمىس قارقىندى ءجۇرىپ جاتىر. سوڭعى 2 ايدا 49 ميلليون قارابالىق شاباعى قۇتقارىلعان.

جۇلدىز قايراتقىزى, فارحات تاجىباەۆ, «الماتى» تەلەارناسى, اتىراۋ وبلىسى