اتىراۋدا اكۆاپارك باسشىسى قاماۋعا الىندى

اتىرۋداعى باسسەيندە بالالار جاپپاي ۋلانعان سوڭ, Palma اكۆاپاركىنىڭ باسشىسى قاماۋعا الىندى, دەپ حابارلادى Qandastar.kz ATYRAU ONLINE telegram-ارناسىنا  سىلتەمە جاساپ.

اتىراۋ قالاسىنىڭ تەرگەۋ سوتىنىڭ قاۋلىسىمەن باسسەين باسشىسىنا ۇيقاماق تۇرىندەگى بۇلتارتپاۋ شاراسى تاعايىندالدى.

كۋاگەرلەردىڭ ايتۋىنشا, باسسەين ىشىندە حلوردىڭ ءيىسى كۇرت كۇشەيىپ, سۋ لايلانىپ كەتكەن. بالالار جوتەلىپ, ەسىنەن تانا باستاعان. اتا-انالار ولاردى قولدارىنا كوتەرىپ, دالاعا الىپ شىققان. وقيعا ورنىنا دارىگەرلەر مەن توتەنشە جاعدايلار قىزمەتى جەدەل جەتكەن.

الدىن الا بولجام بويىنشا, توتەنشە جاعدايعا حلورقۇرامدى زاتتاردىڭ مولشەردەن تىس قوسىلۋى سەبەپ بولعان. باسسەين يەلەرى سۋ تازارتۋ جۇيەسىندە اقاۋ بولعانىن مويىندادى. وقيعادان كەيىن نىسان ۋاقىتشا جابىلىپ, تجد مەن پروكۋراتۋرا تەكسەرۋ جۇمىستارىن باستاعان.

قازىر تەرگەۋ جالعاسىپ جاتىر. تەرگەۋ اياقتالعانعا دەيىن باسسەين باسشىسى ۇيقاماقتا بولادى.