Atyraýda apatty úıler buzylady

Atyraý qalasynda apatty dep tanylǵan úıler buzylady, dep habarlaıdy Qandastar.kz «Atyrau.Today» aqparat portalyna silteme jasap.

Bul bastama «Taza Qazaqstan» baǵdarlamasy aıasynda júzege asyrylyp jatyr. Qazirgi ýaqytta eski qalanyń, JMK shaǵyn aýdanynyń aýmaǵyn tazartý jumystary belsendi júrgizilýde. Bul týraly óńirlik kommýnıkaııalar qyzmeti habarlady.

«Atyraý qalasynyń sheginde búgingi tańda 117 apatty úı tirkelgen, onyń 8-i — kóppáterli turǵyn úı. Qala ákimdigi birtindep eski, tozǵan nysandardy buzý jumystaryn bastady. 40-qa jýyq arnaıy tehnıka jumyldyryldy, búginde 30-ǵa jýyq apatty úıdiń aýmaǵyn qoqystan tolyǵymen tazartý josparlanýda», — dedi qalalyq TKSh jáne turǵyn úı ınspekııasy bólimi bastyǵynyń mindetin atqarýshy Aqesen Ibragımov.

Aıta ketý kerek, Oral jaǵalaýyndaǵy jalpyqalalyq senbilikke 5000-ǵa jýyq erikti qatysyp, ózenniń jaǵalaýyn qoqystan tazartýǵa kómektesti.