اتىراۋدا بلوگەر پروكۋروردىڭ قالتاسىنان 20 مىڭ تەڭگە ۇرلاعانى ءۇشىن سوتتالدى

فوتو: depositphotos.com

اتىراۋ قالاسىنىڭ №2 سوتىندا قورقىتىپ الۋ جانە ۇرلىق جاساعانى ءۇشىن ايىپتالعان بلوگەرگە قاتىستى قىلمىستىق ءىس قارالدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

سوتتىڭ مالىمەتىنشە, جەرگىلىكتى بلوگەر سۋپەرماركەتتىڭ سورەلەرىنەن جارامدىلىق مەرزىمى وتكەن تاۋارلاردى تاۋىپ, كەيىن سۋپەرماركەت قىزمەتكەرىن پوليتسياعا شاعىمداناتىن ايتىپ قورقىتىپ, 2 ملن تەڭگە تالاپ ەتكەن.

پوليتسيا كەلگەن سوڭ بلوگەر جارامدىلىق مەرزىمى وتكەن ونىمدەردى ساتۋ جانە تاۋارلاردا مەملەكەتتىك تىلدە مالىمەتتەردىڭ بولماۋى تۋرالى ارىز جازعان. مۇنىمەن توقتالماعان بلوگەر ارىزىن قايتارىپ الۋ ءۇشىن 39 824 تەڭگەگە ازىق-ت ۇلىك العان.

بىرنەشە كۇننەن كەيىن بلوگەر سوت پروتسەسىنە قاتىسقان ارىپتەسىن قولداۋ ماقساتىندا اتىراۋ قالاسىنىڭ №2 سوتىنا كەلىپ, پروكۋرورلارعا ارنالعان بولمەدەگى ىشىندە قىزمەتتىك كيىم تۇرعان شكافتى اشىپ, پروكۋرورلاردىڭ ءبىرىنىڭ قالتاسىنان 20 مىڭ تەڭگەنى جاسىرىن ۇرلاعان.

سوتتالۋشى كىناسىن مويىنداماي, ءوزىن اقتاۋدى سۇراعان.

“سوتتالۋشىنىڭ كىناسى جابىرلەنۋشىلەردىڭ, كۋالاردىڭ ايعاقتارىمەن جانە تەرگەۋ ارەكەتتەرىنىڭ بەينەجازبالارىمەن ءوز دالەلىن تاپتى. سوت ۇكىمىمەن بلوگەر  كىنالى دەپ تانىلىپ, وعان نەگىزىندە 3 جىل 1 اي مەرزىمگە باس بوستاندىعىنان ايىرۋ تۇرىندەگى جازا تاعايىندالدى”, – دەلىنگەن سوت حابارلاماسىندا.

سوت ۇكىمى زاڭدى كۇشىنە ەنگەن جوق.

ەسكە سالساق, بۇعان دەيىن بلوگەرلەرمەن كيكىلجىڭگە كەلگەننەن كەيىن كوز جۇمعان كۇزەتشىنىڭ ولىمىنە قاتىستى بلوگەرلەردىڭ ۇستىنەن قىلمىستىق ءىس قوزعالعان ەدى.