اتىراۋدا ەنەسىن ءولتىردى دەگەن كۇدىكپەن كەلىنى ۇستالدى

اتىراۋ وبلىسى  قىزىلقوعا اۋدانىنداعى جاسقايرات اۋىلىنىڭ تۇرعىنى ءوز ەنەسىن ءولتىردى دەگەن كۇدىككە ءىلىندى, دەپ حابارلادى Qandastar.kz سايتى Stan.kz-كە سىلتەمە جاساپ.

كىسى ءولتىرۋ وقيعاسى 27 مامىردا بولعان. الدىن الا مالىمەت بويىنشا, 39 جاستاعى ايەل 83 جاستاعى ەنەسىن پىشاقتاپ كەتكەن. زارداپ شەگۋشى شۇعىل تۇردە اۋداندىق اۋرۋحاناعا جەتكىزىلىپ, دارىگەرلەر امان الىپ قالۋعا تىرىسقانىمەن, ول ەسىن جيماي كوز جۇمدى.

اۋدان اكىمى ابات اقبالاش ۇلىنىڭ ايتۋىنشا, بولعان جايت اۋىل تۇرعىندارىن شوشىتىپ وتىر.

«بۇعان دەيىن ەنە مەن كەلىن اراسىندا كيكىلجىڭ ورىن الماعان. وقيعانىڭ نە سەبەپتى بولعانى بەلگىسىز. ءتيىستى ورگاندار اينالىسىپ جاتىر. وقيعا كەزىندە كۇيەۋى ۇيدە بولماعان. ەرلى-زايىپتىلاردىڭ بەس بالاسى بار. ەڭ كەنجەسى ءبىر جارىم جاستا», – دەدى ول.

پوليتسيا مالىمەتىنشە, كۇدىكتى قاماۋعا الىندى. قىلمىستىق ءىس قوزعالىپ, تەرگەۋ ءجۇرىپ جاتىر.

يۋۆەنالدى پوليتسيانىڭ مالىمەتىنشە, كۇدىكتىنىڭ ەكى كىشى بالاسى اكەسىنىڭ كەلىسىمىمەن اتىراۋداعى سابيلەر ۇيىنە ۋاقىتشا ورنالاستىرىلعان.