Jańalyqtar
Atyraýda Qulybaev pen Ábilǵazın kompanııasyn tekserý bastaldy
Foto: ashyq derekkóz
Atyraý oblysynda «Batys Petroleum» kompanııasyna qatysty monopolııalyq zańnamany buzdy degen kúdikpen tergeý bastaldy. Bul týraly Básekelestikti qorǵaý jáne damytý agenttigi málim etti, dep habarlaıdy qandastar.kz Orda.kz-ke siltep.
Agenttiktiń Atyraý oblysy boıynsha departamenti «Batys Petroleum» JShS-ne qatysty tergeýdi jergilikti kásipkerdiń shaǵymy negizinde bastaǵan. Shaǵymdanýshy kompanııanyń vagon-ısternalardy jóndeý qyzmetterine monopolııalyq joǵary baǵa belgilegenin aıtqan. Bul vagondar munaı ónimderin tasymaldaý úshin paıdalanylady.
«Eger monopolııaǵa qarsy zańnamanyń buzylýy rastalsa, Batys Petroleum-ǵa jyldyq aınalymynyń 3-5%-y mólsherinde aıyppul salynady, monopolııalyq tabysy tárkilenedi nemese baǵany ekonomıkalyq negizdelgen deńgeıge deıin tómendetý týraly nusqama beriledi», — delingen agenttik málimdemesinde.
«Batys Petroleum» JShS 2015 jyly mamyr aıynda Atyraý qalasynda tirkelgen. Negizgi qyzmeti — vagon-ısternalardy jóndeý, tekserý jáne munaı ónimderin quıýǵa daıyndaý. Alaıda kompanııa quryltaıshylarynyń tizimi kópshiliktiń nazaryn aýdaryp otyr.
Kompanııanyń jalǵyz ıesi — «Petroleum» JShS. Al «Petroleum»-ǵa úsh zańdy tulǵa ıelik etedi:
•PTC Holding — Tımýr Qulybaevtyń bıznes-qurylymy. Ol bul kompanııany «Kıpros» JShS arqyly baqylaıdy.
•«Neoholding» JShS — quryltaıshylary qatarynda PTC Holding, Nıderlandyda tirkelgen ADNTS Holding B.V. (Qulybaevpen baılanysy bar) jáne bıznesmen Danııar Ábilǵazın bar.
•«Erıdan Invest» JShS — kompanııa týraly málimet az, biraq ol da osy tizbektiń bir bóligi.
Bul — agenttiktiń Qulybaevqa qatysty birinshi tergeýi emes. О́tken jyly agenttik Qulybaev baqylaýyndaǵy «Suıytylǵan munaı gazy qoımasy» JShS-ne mıllıard teńgeden astam aıyppul salǵan edi. Sol kezde kompanııa naryqtaǵy úlesin paıdalanyp, suıytylǵan gazǵa joǵary baǵa belgilegeni anyqtalǵan.
Qazir «Batys Petroleum» isi boıynsha tergeý jalǵasyp jatyr. Eger kompanııanyń baǵa saıasaty zańǵa qaıshy dep tanylsa, bul Atyraý oblysynyń munaı servıstik naryǵynda aıtarlyqtaı ózgeristerge alyp kelýi múmkin.
