اتىراۋدا وبلىستىق سپورت باسقارماسىنىڭ باسشىسى باپكەرلەردەن اقشا جيناعان

فوتو: Stan.kz

سىبايلاس جەمقورلىققا قارسى قىزمەتىنىڭ رەسمي وكىلى ارمان تىلەۋەنوۆ اتىراۋ وبلىسىندا دەنە شىنىقتىرۋ جانە سپورت باسقارماسىنىڭ باسشىسى داستانبەك قوسپانوۆقا قاتىستى قىلمىستىق ءىس تەرگەلىپ جاتقانىن ايتتى. بۇل تۋرالى qandastar.kz اقپارات اگەنتتىگى “موي گورود” باسىلىمىنا سىلتەمە جاساپ حابارلايدى.

داستانبەك قوسپانوۆ «وليمپيادالىق رەزەرۆتى دايارلاۋ ورتالىعىنىڭ» كمم-ءنىڭ اعا جاتتىقتىرۋشىسى مايلاشەۆتەن 1,7 ميلليون تەڭگە كولەمىندە پارا العانى ءۇشىن كىنالى دەپ تانىلدى. شەنەۋنىك بۇل اقشاعا وقۋ-جاتتىعۋ جيىندارىنا بيۋدجەت ەسەبىنەن شىعۋعا كومەكتەسەتىنىن ايتقان. سونىمەن قاتار ول قىزمەت بابىن اسىرا پايدالانعانى ءۇشىن دە كىنالى دەپ تانىلدى. قوسپانوۆ جاتتىقتىرۋشىلارىنان زاڭسىز جالپى سوماسى 2,4 ميلليون تەڭگە جيناعان.

“سونداي-اق باسقارما باسشىسى 1,1 ميلليون تەڭگە كولەمىندە بيۋدجەت قاراجاتىن جىمقىرعانى ءۇشىن ايىپتى دەپ تانىلدى. ول كوممۋنالدىق مەملەكەتتىك مەكەمەدە جۇمىس ىستەمەيتىن ادامدارعا زاڭسىز جالاقى ەسەپتەپ وتىرعان”, – دەلىنگەن حابارلامادا.

21 ساۋىردە اتىراۋ قالاسىنىڭ №2 سوتى وبلىستىق دەنە شىنىقتىرۋ جانە سپورت باسقارماسىنىڭ بۇرىنعى باسشىسى قوسپانوۆقا قاتىستى ۇكىم شىعاردى. قوسپانوۆ 4 جىلعا, ال مايلاشەۆ 3 جىلعا باس بوستاندىعىنان ايىرىلدى.

ەكى سوتتالۋشى دا ءومىر بويى مەملەكەتتىك قىزمەتتە, سۋديا جانە جەرگىلىكتى ءوزىن-ءوزى باسقارۋ ورگاندارىندا قىزمەت اتقارۋ قۇقىعىنان ايىرىلدى