Atyraýda oblystyq sport basqarmasynyń basshysy bapkerlerden aqsha jınaǵan

Foto: Stan.kz

Sybaılas jemqorlyqqa qarsy qyzmetiniń resmı ókili Arman Tileýenov Atyraý oblysynda dene shynyqtyrý jáne sport basqarmasynyń basshysy Dastanbek Qospanovqa qatysty qylmystyq is tergelip jatqanyn aıtty. Bul týraly qandastar.kz aqparat agenttigi “Moı gorod” basylymyna silteme jasap habarlaıdy.

Dastanbek Qospanov «Olımpıadalyq rezervti daıarlaý ortalyǵynyń» KMM-niń aǵa jattyqtyrýshysy Maılashevten 1,7 mıllıon teńge kóleminde para alǵany úshin kináli dep tanyldy. Sheneýnik bul aqshaǵa oqý-jattyǵý jıyndaryna bıýdjet esebinen shyǵýǵa kómektesetinin aıtqan. Sonymen qatar ol qyzmet babyn asyra paıdalanǵany úshin de kináli dep tanyldy. Qospanov jattyqtyrýshylarynan zańsyz jalpy somasy 2,4 mıllıon teńge jınaǵan.

“Sondaı-aq basqarma basshysy 1,1 mıllıon teńge kóleminde bıýdjet qarajatyn jymqyrǵany úshin aıypty dep tanyldy. Ol kommýnaldyq memlekettik mekemede jumys istemeıtin adamdarǵa zańsyz jalaqy eseptep otyrǵan”, – delingen habarlamada.

21 sáýirde Atyraý qalasynyń №2 soty oblystyq dene shynyqtyrý jáne sport basqarmasynyń burynǵy basshysy Qospanovqa qatysty úkim shyǵardy. Qospanov 4 jylǵa, al Maılashev 3 jylǵa bas bostandyǵynan aıyryldy.

Eki sottalýshy da ómir boıy memlekettik qyzmette, sýdıa jáne jergilikti ózin-ózi basqarý organdarynda qyzmet atqarý quqyǵynan aıyryldy