اتىراۋداعى اسكەري مەكتەپتە تەكسەرىس باستالدى

فوتو:AtyrauPress

اتىراۋداعى «سارمات» مامانداندىرىلعان اسكەري مەكتەبىندە وقۋشىلار مەكەمە قىزمەتكەرلەرىنىڭ زورلىق-زومبىلىق كورسەتكەنىن مالىمدەدى, دەپ qandastar.kz اقپارات پورتالى azh.kz-كە سىلتەمە جاساپ حابارلايدى.

وقۋشىلاردىڭ ايتۋىنشا, ولاردى الدەنەشە رەت ۇرىپ-سوعىپ, ەلەكتروشوكەر قولدانىپ, پىشاقپەن قورقىتقان. بۇل جاعداي تۋرالى جابىرلەنۋشىلەردىڭ ءبىرىنىڭ اناسى نۇرگۇل ەسپوسىنوۆا الەۋمەتتىك جەلىدە بايانداپ بەردى. ول كەيىنگى وقيعالاردىڭ ءبىرى 4 جەلتوقساندا بولعانىن ناقتىلادى. سول كۇننەن بەرى ۇلىنىڭ دەنەسىندە ءالى كۇنگە دەيىن سوققى ىزدەرى قالىپ قويعان.

«جاراقاتتانعان جەرلەردى بايقاعان سوڭ, مۇنىڭ قالاي بولعانىن ءبىلۋ ءۇشىن وقۋ ورنىنا كەلدىم, بىراق ديرەكتور دا, مۇعالىم دە بولمادى. ءبىراز ۋاقىتتان كەيىن بالامنىڭ مەكتەپتەن شىعارىلعانىن ءبىلدىم», – دەيدى ول.

ونىڭ ايتۋىنشا, قازاننان باستاپ بالاسىنىڭ مەكتەپكە بارعىسى كەلمەي جۇرگەنىن بايقاعان.

«اتا-انالارعا «بالالارىڭىزعا مەكتەپتە قونۋعا بولادى» دەگەن حابارلاما كەلگەن ەدى. بىراق بالام قالعىسى كەلمەيتىنىن ايتتى. ال ونىڭ مەكتەپتەن شىعارىلۋىنا كەلسەك, ول «ناسىباي قولدانعان» دەپ حابارلادى. كەيىنىرەك ءۇشىنشى تۇلعالاردان بىلگەنىمدەي, ناسىباي بالانىڭ قالتاسىنان تابىلدى دەپ وتىر. بىراق بۇعان كۋاگەرلەر جوق. مەن بۇل ءىستىڭ جينالىستا قارالعانىن بىلمەدىم, ونىڭ ۇستىنە اتا-انالاردىڭ قاتىسۋىنسىز جينالىستا ونى مەكتەپتەن شىعارۋ تۋرالى شەشىم قابىلدانعان. ءوزىنىڭ كىناسىز ەكەنىن دالەلدەۋ ءۇشىن بالام اناليزدەر تاپسىردى. ەشقانداي زات تابىلماعانى تۋرالى قورىتىندى قولىمىزدا. بۇل تۋرالى سىنىپ جەتەكشىسىنە دە ايتتىم. بىراق بالامدى ءبارىبىر وقۋدان شىعارىپ جىبەردى. «نەگە بالانى وقۋدان شىعاراسىزدار?» دەپ سۇراعاندا, جاۋاپ بەرمەدى. ديرەكتوردىڭ ءىسساپاردا ەكەنىن ايتتى. قازىر بالام ۇيدە وقۋسىز وتىر, ەكى رەت مەكتەپتەن قۇجاتتاردى الىپ كەتىڭىز دەپ جازىپتى. بىراق مەن قۇجاتتاردى الۋدان باس تارتتىم, سەبەبى بالام كىنالى ەمەس. پوليتسەيلەر مەن ءبىلىم بەرۋ باسقارماسىنا ارىز جازدىم, بىراق ەش كومەك بولمادى. سوسىن امالسىزدان «Analarga Komek Qoldaw» قب جەتەكشىسى ساندۋعاش كۋكەنوۆاعا جۇگىندىم. بالالارىم جاقسى وقيدى, تارتىپتەرى جاقسى. ەگەر بالام شىنىمەن ءتارتىپسىز بولسا, مەكتەپكە بارىپ جۇرمەس ەدىم», – دەدى ول.

سونداي-اق, اناسى مەكتەپكە وقيتىن بالالارعا ەلەكتروشوكەر قولدانىلاتىن دالەلدەردى ۇسىندى.

«بالاما ەلەكتروشوكەر قولدانعان, كەۋدە تۇسىنان ۇرعان, پىشاق تيگىزگەن, ينە شانشىعان. بالامنىڭ دەنەسىندە پىشاقتىڭ ءىزى ءالى كورىنىپ تۇر», – دەيدى نۇرگۇل.

ال نارازى بولعان وزگە اتا-انالار مەكتەپتى جان-جاقتى تەكسەرىپ, كىنالىلەردى جازالاۋدى تالاپ ەتتى.

باسىلىم تۇسىنىكتەمە الۋ ءۇشىن وبلىستىق ءبىلىم باسقارماسىنىڭ ءباسپاسوز قىزمەتىنە جۇگىندى.

ولاردىڭ مالىمەتىنشە, اتىراۋ وبلىسىنداعى «سارمات» مامانداندىرىلعان مەكتەپ-ليتسەي-ينتەرناتىندا مەكەمە مەن اتا-انالار اراسىندا كەلىسىم جاسالعان.

اتىراۋداعى «سارمات» مامانداندىرىلعان مەكتەپ-ليتسەي ينتەرناتىندا 236 وقۋشى ءبىلىم الادى. 39 مۇعالىم, 19 تاربيەشى قىزمەت ەتەدى. اتا-انالارمەن ارادا ءوزارا قول قويىلعان كەلىسىمى بار.

«بۇل وقۋشى مەكتەپتە بىرنەشە رەت تارتىپسىزدىك جاساعان. اتا-اناسىنا ەسكەرتىلگەن. بالا مەكتەپىشىلىك ەسەپكە الىنعان. 2024 جىلعى قىركۇيەكتە بالا تارتىپسىزدىك جاساپ, «ەسكەرتۋمەن» مەكتەپتە قالدىرىلعان. جەلتوقساندا تارتىپسىزدىك قايتالانعان سوڭ اتا-اناسى شاقىرىلادى. ولار كەلمەيدى. بالا 9 جەلتوقسان كۇنى پەداگوگيكالىق كەڭەستىڭ شەشىمىمەن مەكتەپتەن شىعارىلادى», – دەپ حابارلادى وبلىستىق ءبىلىم باسقارماسىنىڭ ءباسپاسوز قىزمەتى.

قازىر اتا-انانىڭ ارىزى بويىنشا تەرگەۋ امالدارى ءجۇرىپ جاتىر. ءبىلىم بەرۋ باسقارماسىمەن وقۋ-تاربيە پروتسەسىنىڭ ۇيىمداستىرىلۋى بويىنشا زەردەلەۋ جۇمىستارى ءوتىپ جاتىپ. وقۋشىعا پسيحولوگيالىق كومەك كورسەتىلەدى.