اۋديت قورىتىندىسى: جاتاقحانا ماسەلەسىندە جۇيە جوق

فوتو: سپۋتنيك.كز

عىلىم جانە جوعارى ءبىلىم ءمينيسترى ساياسات نۇربەك جاتاقحانا جەتىسپەۋشىلىگى ماسەلەسىن مويىندادى.  مينيستر مۇنىڭ شەشىمىن جەكە سەكتوردى كوبىرەك تارتۋدان كورەدى.  الايدا جوعارى اۋديتورلىق پالاتا باسقانى مەڭزەپ وتىر, – دەپ حابارلايدى qandastar.kz

جاتاقحاناداعى ورىن تاپشىلىعى بۇرىننان كەڭ ەتەك العان. ءار وقۋ جىلىنىڭ باسى كەلەڭسىزدىكتەرگە ۇلاسادى. 2023 جىلدىڭ قاراشاسىندا الماتىداعى حوستەلدەردىڭ بىرىندە بولعان قايعىلى وقيعادان كەيىن ء(ورت سالدارىنان 13 ادام قازا تاپتى), مينيسترلىككە ايىپ تاعىلعانى تاعى بار.

بۇل ماسەلەنى الماتىداعى وقيعا الدىندا پرەزيدەنت قاسىم-جومارت توقاەۆ تا كوتەرگەن بولاتىن. ول مۇنى مەحانيزم ارقىلى  شەشۋدى مينيستر ساياسات نۇربەككە تاپسىردى. ساياسات نۇربەك تە مينيسترلىك قۇرىلا سالىسىمەن اتالعان پروبلەما كۇن تارتىبىنەن تۇسپەگەنىن العا تارتادى.

«2021 جىلى جەكە باعدارلاما ىسكە قوسىلدى, بۇگىنگى تاڭدا 27 مىڭ توسەكتىك 127 نىسان پايدالانۋعا بەرىلدى. جىل سايىن 10 مىڭ توسەك-ورىن اشىلادى.

ءبىز ۇلگىرە المايمىز, بىردەن ايتامىن, سەبەبى ءبىر عانا ۇبت-عا قاراساق, بيىل 347 مىڭ ءوتىنىش ءتۇستى, ول وتكەن جىلعىدان ءبىرشاما كوپ. ەندى تۇيتكىلدى جەكە سەكتوردى تارتۋ ارقىلى شەشەمىز», – دەدى مينيستر ۇكىمەتتە وتكەن ءباسپاسوز ءماسليحاتىندا.

الايدا, جوعارعى اۋديتورلار پالاتاسى جاعداي قاشان وزگەرەرى بەلگىسىز دەيدى. اۋديتورلار مينيسترلىكتە بولاشاق قاجەتتىلىكتەردى, دەموگرافيالىق جاعدايدى جانە كوشى-قون پروتسەستەرىن ەسكەرە وتىرىپ, ءارتۇرلى ايماقتاردا جاتاقحانالاردى ەنگىزۋ جوسپارى جوق ەكەنىن اتاپ ءوتتى.

«جوعارى ءبىلىم مەن عىلىمدى دامىتۋدىڭ 2023-2029 جىلدارعا ارنالعان تۇجىرىمداماسىندا جىل سايىن 10 مىڭ جاڭا ورىن پايدا بولۋ كەرەك, بىراق وبلىستار مەن قالالار بويىنشا بۇل ماسەلەدە ناقتىلىق جوق.

جاتاقحانالاردا مەملەكەتتىك تاپسىرىستى ورنالاستىرۋ ەرەجەلەرىندە دە بىرقاتار جايت  ەسكەرىلمەگەن. بيۋدجەت ناقتى قاجەتتىلىككە ەمەس, جەتكىزۋشىلەرمەن جاسالعان كەلىسىم-شارت سانىنا قاراي قالىپتاسۋدا, – دەلىنگەن جاپ قورىتىندىسىندا.

بيۋدجەت قاراجاتىن ءتيىمسىز پايدالانۋدىڭ تاۋەكەلدەرىنە كەلەر بولساق, اۋديتورلار مەملەكەتتىك ورگانداردىڭ, «قارجى ورتالىعى» اق (جاتاقحانا قۇرىلىسى وپەراتورى), جوعارى وقۋ ورىندارى مەن جەتكىزۋشىلەر جۇمىسىنىڭ جۇيەلى جۇرگىزىلمەيتىنىن اشىق ايتادى. جاڭا ورىندار تەك بيزنەستىڭ باستاماسىمەن عانا ەنگىزىلۋدە, ال بۇل ورىنداردى ستۋدەنتتەرمەن تولتىرۋ  جەتكىزۋشى ءۇشىن قيىندىق تۋدىرادى.

بۇعان قوسا ستۋدەنت ايىنا كەمى 12 ساعات جاتاقحانادا تۇرۋ كەرەك, ايتپەسە مەملەكەتتىك تاپسىرىس بويىنشا تولەم جاسالمايدى. سايكەسىنشە سول ايدا ستۋدەنت وقۋدان شىعارىلعان بولسا, قارجى دا جوق. ال, بۇل ماسەلەلەردى رەتكە كەلتىرۋدى كىم كەرەك ەتپەي وتىرعانى بەلگىسىز…