Aýdıt qorytyndysy: Jataqhana máselesinde júıe joq

Foto: Spýtnık.kz

Ǵylym jáne joǵary bilim mınıstri Saıasat Nurbek jataqhana jetispeýshiligi máselesin moıyndady.  Mınıstr munyń sheshimin jeke sektordy kóbirek tartýdan kóredi.  Alaıda Joǵary aýdıtorlyq palata basqany meńzep otyr, – dep habarlaıdy qandastar.kz

Jataqhanadaǵy oryn tapshylyǵy burynnan keń etek alǵan. Ár oqý jylynyń basy keleńsizdikterge ulasady. 2023 jyldyń qarashasynda Almatydaǵy hostelderdiń birinde bolǵan qaıǵyly oqıǵadan keıin (órt saldarynan 13 adam qaza tapty), mınıstrlikke aıyp taǵylǵany taǵy bar.

Bul máseleni Almatydaǵy oqıǵa aldynda Prezıdent Qasym-Jomart Toqaev ta kótergen bolatyn. Ol muny mehanızm arqyly  sheshýdi mınıstr Saıasat Nurbekke tapsyrdy. Saıasat Nurbek te mınıstrlik quryla salysymen atalǵan problema kún tártibinen túspegenin alǵa tartady.

«2021 jyly jeke baǵdarlama iske qosyldy, búgingi tańda 27 myń tósektik 127 nysan paıdalanýǵa berildi. Jyl saıyn 10 myń tósek-oryn ashylady.

Biz úlgire almaımyz, birden aıtamyn, sebebi bir ǵana UBT-ǵa qarasaq, bıyl 347 myń ótinish tústi, ol ótken jylǵydan birshama kóp. Endi túıtkildi jeke sektordy tartý arqyly sheshemiz», – dedi mınıstr úkimette ótken baspasóz máslıhatynda.

Alaıda, Joǵarǵy aýdıtorlar palatasy jaǵdaı qashan ózgereri belgisiz deıdi. Aýdıtorlar mınıstrlikte bolashaq qajettilikterdi, demografııalyq jaǵdaıdy jáne kóshi-qon proesterin eskere otyryp, ártúrli aımaqtarda jataqhanalardy engizý jospary joq ekenin atap ótti.

«Joǵary bilim men ǵylymdy damytýdyń 2023-2029 jyldarǵa arnalǵan tujyrymdamasynda jyl saıyn 10 myń jańa oryn paıda bolý kerek, biraq oblystar men qalalar boıynsha bul máselede naqtylyq joq.

Jataqhanalarda memlekettik tapsyrysty ornalastyrý erejelerinde de birqatar jaıt  eskerilmegen. Bıýdjet naqty qajettilikke emes, jetkizýshilermen jasalǵan kelisim-shart sanyna qaraı qalyptasýda, – delingen JAP qorytyndysynda.

Bıýdjet qarajatyn tıimsiz paıdalanýdyń táýekelderine keler bolsaq, aýdıtorlar memlekettik organdardyń, «Qarjy ortalyǵy» AQ (jataqhana qurylysy operatory), joǵary oqý oryndary men jetkizýshiler jumysynyń júıeli júrgizilmeıtinin ashyq aıtady. Jańa oryndar tek bıznestiń bastamasymen ǵana engizilýde, al bul oryndardy stýdenttermen toltyrý  jetkizýshi úshin qıyndyq týdyrady.

Buǵan qosa stýdent aıyna kemi 12 saǵat jataqhanada turý kerek, áıtpese memlekettik tapsyrys boıynsha tólem jasalmaıdy. Sáıkesinshe sol aıda stýdent oqýdan shyǵarylǵan bolsa, qarjy da joq. Al, bul máselelerdi retke keltirýdi kim kerek etpeı otyrǵany belgisiz…