«اۋعانستان بولدىق»: اقتوبەدە قىزدارعا ارنالعان جەكە مەكتەپ اشىلدى

فوتو: ۆيدەودان سكرينشوت

جەلىدە اقتوبەدە قىزدارعا ارنالعان جەكەمەنشىك مەكتەپتىڭ اشىلعانى تۋرالى ۆيدەو پايدا بولدى. ول جەردە 400-دەن اسا قىز بالا ءبىلىم الادى, دەپ حابارلايدى qandastar.kz KYN.KZ-كە سىلتەمە جاساپ.

وقۋ ورنى ورامالدى وقۋشىلاردىڭ ءبىلىم الۋى ءۇشىن سالىنعان ەكەن.

بۇل – جەكە مەكتەپ. ليتسەنزيا الدىق. ءبىلىم باسقارماسى حاباردار. اشىلۋ سالتاناتىن وتكىزدىك. وبلىستىق ءبىلىم باسقارماسى, قالالىق ءبىلىم بولىمىنەن قىزمەتكەرلەر جانە وسى اۋدانعا جاۋاپتى دەپۋتات كەلدى. تىعىلىپ جۇمىس ىستەپ جاتقان جوقپىز. 1 قىركۇيەكتە 1 جانە 9-سىنىپ وقۋشىلارى كەلدى. سونى بىرەۋ ءتۇسىرىپ, «اۋعانستان بولدىق» دەپ سالعان. مەكتەپتە بالالار ستاندارتقا ساي وقىتىلادى, – دەپ مالىمدەدى «اتامەكەن» مەكتەبىنىڭ ديرەكتورى ۆەنەرا جولدىباەۆا.

بۇرىن قالادا قىزدارعا ارنالعان «قۇنان» مەكتەبى بولعان. ول جابىلىپ, ورنىنا وسى «اتامەكەن» ءبىلىم وشاعى اشىلعان.

مەكتەپ فورماسىنا قويىلاتىن تالاپتار ورىندالادى. وقۋ باعدارلاماسى ءبىلىم ستاندارتىنا ساي جۇرگىزىلەدى. وقۋشىلار سىرتتان ورامال تارتىپ كەلگەنمەن, ىشكە كىرگەندە شەشەدى. ساباقتا ورامالسىز وتىرادى. مەكتەپ قابىرعاسىندا ىشكى تالاپ ەرەجەلەرى تولىق ساقتالادى. ورامال تارتاتىن مۇعالىم جوق دەپ ايتا المايمىن. ونداي مۇعالىمدەر بار. «قۇنان» مەكتەبىنەن كەلگەن 7 مۇعالىم بار. بىراق مەكتەپ ىشىندە ول كىسىلەر ورامال تارتپايدى. مۇعالىمدەر دە مەكتەپ فورماسىن ساقتايدى. وقۋشىلار اراسىندا ورامال تارتاتىن جانە تارتپايتىن قىزدار بار. مەكتەپ تەك اقتوبە وبلىسىنىڭ بالالارىنا ارنالعان. سۇرانىس كوپ, – دەدى ديرەكتور.

جەكەمەنشىك مەكتەپتە 430 قىز ەكى اۋىسىممەن وقيدى. 1-9-سىنىپ اراسىنداعى وقۋشىلاردى قابىلدايدى. ءار اتا-انا ايىنا 30 مىڭ تەڭگە تولەيدى ەكەن. كوپبالالى, ەرەكشە بالا تاربيەلەپ وتىرعان اتا-انالارعا جەڭىلدىك بار.

سونىمەن بىرگە مەكتەپ ديرەكتورى ءبىلىم بەرۋ مەكەمەسىندە وقۋشىلاردىڭ ناماز وقىمايتىنىن جانە ناماز وقيتىن ورىننىڭ جوق ەكەنىن ايتتى.

ءبىلىم الۋشىلار ءبىلىم جانە عىلىم ءمينيسترىنىڭ 2016 جىلعى 14 قاڭتارداعى №26 «ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتۋ تۋرالى» بۇيرىعىنىڭ تالاپتارىن ورىنداپ وتىر. مەكتەپتەگى وقۋ-تاربيە پروتسەسى وقۋ-اعارتۋ ءمينيسترىنىڭ 2022 جىلعى 3 تامىزدا  بەكىتىلگەن «مەكتەپكە دەيىنگى تاربيە مەن وقىتۋدىڭ, باستاۋىش, نەگىزگى ورتا, جالپى ورتا, تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋدىڭ مەملەكەتتىك جالپىعا مىندەتتى ستاندارتتارىن بەكىتۋ تۋرالى» №348  بۇيرىعىنا سايكەس جۇرگىزىلەدى, – دەدى اقتوبە وبلىسى ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.