الەم جاڭالىقتارى
اۋعانستاندا جويقىن جەر سىلكىنىسى بولىپ, 600-دەن استام ادام قازا تاپتى
فوتو: اشىق دەرەككوز
اۋعانستاننىڭ شىعىسىنداعى كۋنار پروۆينتسياسىندا ماگنيتۋداسى 6-عا جەتەتىن جەر سىلكىنىسى بولىپ, الدىن الا مالىمەتتەر بويىنشا 600-دەن استام ادام كوز جۇمدى, 1500 ادام جارالاندى, دەپ جازدى qandastar.kz
بۇل تۋرالى Stan.kzاقپارات اگەنتتىگى حابارلايدى.
اۋعانستان اقپارات مينيسترلىگىنىڭ حابارلاۋىنشا, ەڭ كوپ زارداپ كۋنار پروۆينتسياسىنىڭ اۋداندارىندا تىركەلگەن, جولدار توپان سۋ مەن جەر قاباتى سىرعۋى سالدارىنان جابىلعان, ىزدەۋ-قۇتقارۋ جۇمىستارى تىكۇشاقتاردىڭ كومەگىمەن جۇرگىزىلىپ جاتىر.
اۋعانستان ۋاقىتشا ۇكىمەتىنىڭ ءباسپاسوز حاتشىسى زابيحۋللا مۋدجاحيد اقش كومپانياسى X الەۋمەتتىك جەلىسىندە جەر سىلكىنىسى ادام شىعىنىنا الىپ كەلگەنىن راستادى.
“وكىنىشكە قاراي, بۇگىنگى جەر سىلكىنىسى شىعىس پروۆينتسيالارىندا ادام ولىمىنە جانە ماتەريالدىق زالالعا اكەلدى”, — دەدى ول.
ول جەرگىلىكتى بيلىك پەن تۇرعىنداردىڭ قۇتقارۋ وپەراتسيالارىنا قاتىسىپ جاتقانىن, ورتالىق ۇكىمەت پەن كورشىلەس پروۆينتسيالاردان كوماندالار اپات ايماعىنا جىبەرىلىپ جاتقانىن اتاپ ءوتتى.
جەرگىلىكتى شەنەۋنىكتەر بۇل ەلدە بولعان ەڭ كۇشتى جەر سىلكىنىستەردىڭ ءبىرى ەكەنىن اتاپ ءوتتى. سونىمەن قاتار, وڭىردە ماگنيتۋداسى 5,2-گە جەتەتىن كەم دەگەندە ەكى قايتالاما ءدۇمپۋ تىركەلگەن.
اقش گەولوگيالىق قىزمەتىنىڭ (USGS) دەرەگىنشە, جەر سىلكىنىسىنىڭ ەپيتسەنترى دجەلالابادتان سولتۇستىك-شىعىسقا قاراي 27 شاقىرىم جەردە, 8 شاقىرىم تەرەڭدىكتە ورنالاسقان, پاكىستانمەن شەكاراعا جاقىن.
