«اۋلاق جۇرىڭدەرشى»: جانار ايجانوۆا اتىشۋلى حاسانمەن تۇسكەن سۋرەتى تۋرالى پىكىر ءبىلدىردى

كوللاج: ozgeris.info

جۋرناليست جان احماديەۆ ءبىر توپ ونەر وكىلدەرىنەن تالعارداعى وقيعاعا قاتىستى پىكىر ءبىلدىرۋىن سۇرادى, دەپ حابارلايدى Ozgeris.Info.

بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جاريالادى.

ونىمەن تىكەلەي اينالىسىپ جاتقان قۇقىق قورعاۋ ورگاندارى بار. ونى اكتەر دا, اكادەميك تا ايتۋى مۇمكىن. بىراق ودان وزگەرىپ جاتقان ەشتەڭە جوق سياقتى, – دەيدى اكتەر جاناتبەك بايتەكوۆ.

ال ءانشى ميراس بەكجانوۆ بولسا, قوعامداعى داۋلى وقيعا تۋرالى پىكىر ءبىلدىرۋ ونىڭ مىندەتىنە جاتپايتىنىن العا تارتتى.

جوق مەن ەشتەڭە سالعان جوقپىن. ول تۋرالى جەلىگە بىردەڭە سالۋ مىندەت ەمەس دەپ ويلايمىن. جاۋاپتى ادامدار زەرتتەپ, شەشىپ جاتىر, – دەدى ول.

ال جەلىدە اتىشۋلى حاسانمەن بىرگە تۇسكەن سۋرەتى تاراعان جانار ايجانوۆا جاۋاپ بەرۋدەن باس تارتتى.

مەن وندايدا ايتپايمىن. مەنىڭ شارۋام جوق ساياساتتا. اۋلاق جۇرىڭدەرشى, – دەدى ءداستۇرلى ءانشى.

ال جان احماديەۆ ەل الدىندا جۇرگەننىڭ ءبارى ەل ىشىندە بولىپ جاتقان وقيعاعا ارالاسۋى كەرەك دەپ ەسەپتەيدى.

ءانشى بولسىن, بلوگەر بولسىن حالىقتىڭ ارقاسىنا كۇن كورىپ وتىرعاننان كەيىن ەسەپ بەرۋى كەرەك دەپ ويلايمىن. انشىلەرمەن سويلەسكىمىز كەلگەن. ءبىرازى باس تارتىپ, بۇل تاقىرىپتى قوزعاعىسى كەلمەيتىندەرىن ايتتى, – دەدى ول.