اۋىل كاسىپكەرى ەلدوس سمەتوۆكە 100 باس جىلقى سىيلادى

فوتو: سالي سابيروۆ

دزيۋدودان پاريج وليمپياداسىنىڭ چەمپيونى اتانعان ەلدوس سمەتوۆكە اقتوبەلىك كاسىپكەر انۋار ماحانوۆ 100 جىلقى سىيلاماق, دەپ حابارلادى turkystan.kz nur.kz-كە سىلتەمە جاساپ.

پاريج وليمپياداسىندا 60 كەلى سالماقتا سىنعا تۇسكەن سمەتوۆ قارسىلاس شىداتپاي, چەمپيون اتاندى. بۇل جەڭىس كۇللى قازاق حالقىن قۋانتپاي قويمادى. ال بۇگىندە باتىرىن ۇلىقتاۋعا اسىققان ادامنىڭ سانىندا ەسەپ جوق.

سولاردىڭ ءبىرى – اقتوبە وبلىسى بايعانين اۋدانى جارقامىس اۋىلىنىڭ تۋماسى انۋار ماحانوۆ.

ماحانوۆ كوپتەگەن قازاق جانكۇيەرى سياقتى ەلدوستىڭ جەڭىسىنە ەرەكشە قۋانىپ, چەمپيونعا 100 باس جىلقى سىيلايتىنىن ايتتى. ول پاريجدەگى قازاق باتىرىمەن تىكەلەي سويلەسىپ, سىيلىعىن دايىنداپ قويعانىن دا جەتكىزگەن.

«ەلدوس – ناعىز قازاق باتىرى. ول وسى التىنعا جەتۋ ءۇشىن ءوز جاستىعىن سارپ ەتتى. اتا-اناسىنىڭ, قالىڭ ەلدىڭ ءۇمىتىن اقتاپ, جاراقاتىنا, كوپتەگەن قيىندىققا قاراماستان, ەلىمىزدىڭ بايراعىن بيىكتەتتى. بىزدە تولىپ جاتقان وليمپيادا چەمپيونى جوق, سوندىقتان ەلدوس باتىرىمىز قانداي قۇرمەتكە دە لايىقتى. ءوزىم اۋىل شارۋاشىلىعىمەن اينالىساتىندىقتان, 100 جىلقى تارتۋ ەتەمىن», – دەيدى اسىل تۇقىمدى جىلقى اسىراۋمەن اينالىساتىن كاسىپكەر انۋار اقمىرزا ۇلى.