Aýyl kásipkeri Eldos Smetovke 100 bas jylqy syılady

Foto: Salı Sabırov

Dzıýdodan Parıj Olımpıadasynyń chempıony atanǵan Eldos Smetovke aqtóbelik kásipker Anýar Mahanov 100 jylqy syılamaq, dep habarlady turkystan.kz nur.kz-ke silteme jasap.

Parıj Olımpıadasynda 60 keli salmaqta synǵa túsken Smetov qarsylas shydatpaı, chempıon atandy. Bul jeńis kúlli qazaq halqyn qýantpaı qoımady. Al búginde batyryn ulyqtaýǵa asyqqan adamnyń sanynda esep joq.

Solardyń biri – Aqtóbe oblysy Baıǵanın aýdany Jarqamys aýylynyń týmasy Anýar Mahanov.

Mahanov kóptegen qazaq jankúıeri sııaqty Eldostyń jeńisine erekshe qýanyp, chempıonǵa 100 bas jylqy syılaıtynyn aıtty. Ol Parıjdegi qazaq batyrymen tikeleı sóılesip, syılyǵyn daıyndap qoıǵanyn da jetkizgen.

«Eldos – naǵyz qazaq batyry. Ol osy altynǵa jetý úshin óz jastyǵyn sarp etti. Ata-anasynyń, qalyń eldiń úmitin aqtap, jaraqatyna, kóptegen qıyndyqqa qaramastan, elimizdiń baıraǵyn bıiktetti. Bizde tolyp jatqan Olımpıada chempıony joq, sondyqtan Eldos batyrymyz qandaı qurmetke de laıyqty. О́zim aýyl sharýashylyǵymen aınalysatyndyqtan, 100 jylqy tartý etemin», – deıdi asyl tuqymdy jylqy asyraýmen aınalysatyn kásipker Anýar Aqmyrzauly.