«اۋىل كىتاپحانالارىنا 100 كىتاپ» اكتسياسى باستالدى

بۇل جايىندا مادەنيەت جانە اقپارات ءمينيسترى مالىمدەدى. ايدا بالاەۆا الەۋمەتتىك جەلىدەگى پاراقشاسىندا شارانىڭ ءمان-ماڭىزىنا توقتالىپ, باستامانىڭ وزگە سالا وكىلدەرى تاراپىنان قولداۋ تاپقانىن اتاپ ءوتتى. «مەملەكەت باسشىسى ۇلتتىق قۇرىلتايدا كىتاپ ماسەلەسىنە ەرەكشە توقتالدى. پرەزيدەنت ءوز سوزىندە: «شىن مانىندە كىتاپ وقيتىن ەل زيالى ۇلتقا اينالادى. ءبىز جاس ۇرپاقتىڭ كىتاپقا قۇشتارلىعىن وياتۋىمىز كەرەك» دەگەن بولاتىن. وسى ورايدا «اۋىل كىتاپحانالارىنا 100 كىتاپ» اتتى اكتسيانى باستادىق», – دەدى مينيستر. ايدا بالاەۆا اكتسيا اياسىندا اباي قۇنانباي ۇلىنىڭ اۋىلى قاراۋىلعا جانە قانىش ساتباەۆتىڭ اۋىلى باياناۋىلعا جانە ءوز تۋعان جەرىنە الەم جانە قازاق ادەبيەتىنىڭ ۇزدىك شىعارمالارىن, تانىمدىق-اعارتۋشىلىق ادەبيەتتەر تارتۋ ەتكەنىن تىلگە تيەك ەتتى. «بۇل اكتسيانى وزگە ارىپەستەرىم, مينيسترلەر قولداپ, بىرنەشە اۋىلعا كىتاپ جەتكىزىپ ۇلگەردى. ماسەلەن, ىشكى ىستەر ءمينيسترى, اۋىل شارۋاشىلىعى ءمينيسترى, ەڭبەك جانە حالىقتى الەۋمەتتىك قورعاۋ ءمينيسترى, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى بولعان باعدات باتىربەك ۇلى جەكە اتسالىسىپ, بىرقاتار وڭىردەگى اۋىل كىتاپحانالارىنا 100 كىتاپتان تابىس ەتىپ جاتىر. بۇل باستاما ارقىلى شالعايداعى اۋىل كىتاپحانالارىنا سوڭعى شىققان جاڭا تۋىندىلاردى جەتكىزىپ, وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋدى ماقسات ەتىپ وتىرمىز. اكتسياعا وزگە مەكەمەلەر مەن ۇيىمدار, جاناشىر ازاماتتار اتسالىسادى دەپ سەنەمىز»,  – دەگەن ايدا بالاەۆا.