جاڭالىقتار
اۋىل تۇرعىندارىنا 800 قاز بالاپانى تەگىن تاراتىلدى
فوتو: «اۋىل پارتياسىنىڭ» رەسمي پاراقشاسىنان
كۇنى كەشە اقمولا وبلىسى اقكول اۋدانىنىڭ امانگەلدى اۋىلىندا «قاز حابى» جوباسى ىسكە قوسىلدى, دەپ حابارلايدى El.kz اقپارات اگەنتتىگى.
اۋىل تۇرعىندارىنا 15 كۇندىك 800 قاز بالاپانى مەن 625 كەلى قۇراما جەم تاراتىلدى. اتالعان جوبانىڭ ماقساتى – اۋىل تۇرعىندارىن سۋدا جۇزەتىن قۇستاردى ءوسىرۋ تەحنولوگياسىنا ۇيرەتۋ, اۋىل جۇرتىنىڭ تابىستارىن ارتتىرۋ جانە بولاشاقتا كووپەراتسيا قۇرۋ.
جوبا اياسىندا ءار وتباسى 160 قاز پەن 125 كگ قۇراما جەم الىپ, 5 ايدان سوڭ قاراشا-جەلتوقسان ايلارىندا استانا قالاسىنىڭ ينۆەستور-تۇرعىندارىنا تازا سالماعى 4,4 كگ كەم ەمەس ءاربىر ءتورتىنشى قازدى قايتارادى. وسىلايشا جوباعا قاتىسۋشى ينۆەستورلارعا 160 وسكەلەڭ قاز بالاپانىنان جالپى سالماعى 176 كگ تازا ەتتى قۇرايتىن 40 قازدى عانا قايتارادى. قالعان 120 قاز جوباعا قاتىسۋشىسىندا قالادى.
ياعني, ونىڭ قاز كۇتىمىن جاقسى قامتاماسىز ەتكەن جاعدايدا, 5 اي ىشىندە شامامەن 1 ملن تەڭگە تابىس تابۋ مۇمكىندىگىنە يە.
بولاشاقتا اقكول اۋدانىندا ينكۋباتسيالىق جۇمىرتقا ءوندىرۋ, ينكۋباتوري, مال ازىعى تسەحى, سويۋ تسەحى, سويىلعان ءونىمدى جانە مامىق پەن قاۋىرسىندى قايتا وڭدەۋ, ەتتى كونسەرۆىلەۋ جانە تاعى باسقا ءۇشىن قاز فەرمالارىن قۇرۋ جوبالارىن قولعا الۋ جوسپارلانۋدا.
