«اۋىلداستارى كوشىپ كەتۋىن تالاپ ەتۋدە»: اسىلىمنىڭ ولىمىنە كۇدىكتى تاعى ءبىر قىزدى اجەتحاناعا تاستاماقشى بولعان

كوللاج: inbusiness.kz

تۇركىستان وبلىسى سىرگەلى اۋىلىندا اجەتحاناعا قۇلاپ كەتكەن 3 جاسار اسىلىمنىڭ ءولىمى تۋرالى جاڭا دەرەكتەر پايدا بولدى. العاشىندا قىز ابايسىزدا دارەتحاناعا ءوزى ءتۇسىپ كەتكەن دەپ ايتقانىمەن, ەندى ونى بىرەۋ يتەرىپ جىبەرگەن دەپ ايتىلدى, دەپ حابارلايدى Ozgeris.Info.

مامىردىڭ ورتاسىندا تاڭعى 09:00 شاماسىندا اسىلىم كەنەتتەن جوعالىپ كەتتى. ءۇش كۇننەن سوڭ ونىڭ ءمايىتى قارسى بەتتەگى ءۇيدىڭ اجەتحاناسىنان تابىلدى.

سارىاعاش سوت-مەديتسينالىق ساراپتاماسى قىزدىڭ بەتىندە ازداعان سىزاتتار, ارقاسىندا كوگەرگەن جەرلەردى انىقتادى. بۇل جاراقات دارەتحانا تەسىگىنە قۇلاعان كەزدە بولدى دەگەن بولجام پايدا بولدى. ماماندار اسىلىم اجەتحاناعا ءوزى قۇلاعان دەگەن قورىتىندىعا كەلدى.

تەرگەۋ قايتا باستالىپ, اسىلىمنىڭ ءولىمى قاساقانا كىسى ءولتىرۋ ەكەنى كوپ ۇزاماي بەلگىلى بولدى. اسىلىمنىڭ ۇيىنە قاراما-قارسى تۇراتىن 16 جاستاعى كورشىسى كۇدىككە ءىلىندى.

“بويجەتكەن كىناسىن مويىندادى. تەرگەۋ بارىسىندا كۇدىكتىنىڭ شيزوفرەنيامەن اۋىراتىنى انىقتالدى. بىراق ورتا مەكتەپتە 9 سىنىپ وقيتىن قىز قالاي اۋرۋ بولىپ قالدى”, – دەپ جازدى جۋرناليست گۇلميرا ابىقاي.

جاعدايعا تۇركىستان وبلىسى پوليتسيا دەپارتامەنتىنىڭ ءباسپاسوز قىزمەتى تۇسىنىكتەمە بەردى.

“پوليتسيا 3 جاسار قىزدىڭ مەرت بولۋ فاكتىسى بويىنشا تەرگەۋ جۇرگىزىپ جاتىر, ونىڭ دەنەسى مامىردا سارىاعاش اۋدانىندا دارەتحانادان تابىلعان. تەرگەۋ ءىس-شارالارى بارىسىندا بۇل وقيعاعا كامەلەتكە تولماعان كۇدىكتىنىڭ قاتىسى بولۋى مۇمكىن ەكەندىگى انىقتالدى.

انىقتالعان جاعدايلارعا بايلانىستى جانە كۇدىكتىنىڭ پسيحولوگيالىق جاعدايىن ەسكەرە وتىرىپ, ول مامانداندىرىلعان مەديتسينالىق مەكەمەگە ورنالاستىرىلدى.

قازىرگى ۋاقىتتا ءىستىڭ بارلىق ءمان-جايلارىن تولىق جانە جان-جاقتى انىقتاۋعا باعىتتالعان سوتقا دەيىنگى تەرگەۋ جالعاسىپ جاتىر.  پوليتسيا اقيقاتتى انىقتاۋعا جانە زاڭدى شەشىم قابىلداۋعا بار كۇشىن سالادى”, – دەدى پد ءباسپاسوز حاتشىسى.

1 ايدان كەيىن كورشى ۇيدەگى تاعى ءبىر قىز سول دارەتحاناعا قۇلاپ كەتە جازدادى, بىراق دەر كەزىندە قۇتقارىلدى. امان قالعان 5 جاسار نۇراي ونى بىرەۋ يتەرىپ جىبەرگەنىن ايتىپتى.