“اۋىر زاتپەن ۇرعان”. ەر ادام ايەلىنىڭ دەنەسىن ەكى اي بويى كولىگىنىڭ جۇك سالعىشىندا ساقتاعان

وڭتۇستىك كورەيانىڭ سۋۆون قالاسىندا ەر ادام ءوز ايەلىن ءولتىرىپ, ونىڭ دەنەسىن ەكى اي بويى كولىگىنىڭ جۇك سالعىشىندا جاسىرعان. بۇل تۋرالى The Korea Times باسىلىمى سوت ماتەريالدارىنا سىلتەمە جاساپ حابارلادى, دەپ جازادى Qandastar.kz اقپاراتتىق پورتالى. 

تەرگەۋ مالىمەتىنشە, قايعىلى وقيعا 2023 جىلدىڭ 26 قاراشاسىندا بولعان. شامامەن 40 جاستاعى ەر ادام جانجال كەزىندە ايەلىن اۋىر زاتپەن ۇرىپ, ونىڭ دەنەسىن كورپەگە وراپ, كولىگىنىڭ جۇك سالعىشىنا تىعىپ قويعان. كەيىن كولىكتى ۇيىنە جاقىن ماڭداعى تۇراققا قويعان, دەپ جازادى «حولود» جۋرنالى.

وقيعا ايەلدىڭ تانىسى ونى جوعالىپ كەتتى دەپ پوليتسياعا حابارلاعاننان كەيىن اشكەرە بولدى. قۇقىق قورعاۋ ورگاندارى ىزدەۋ جۇمىستارىن باستاپ, 2024 جىلدىڭ 19 اقپانىندا كۇيەۋىن ۇستادى. تەرگەۋ كەزىندە ول ءوز ءىسىن مويىنداپ, ايەلىنىڭ دەنەسى قايدا ەكەنىن كورسەتكەن.

ايىپتالۋشىنىڭ ادۆوكاتىنىڭ ايتۋىنشا, ەر ادام اۋىر كۇيزەلىسكە تۇسكەن, بۇل ونىڭ قارجىلىق قيىندىقتارى مەن «ۆوكال فيشينگ» (تەلەفون ارقىلى الاياقتىق) قۇربانى بولۋىنان تۋىنداعان. ايىپتالۋشى قىلمىس جاساعان ساتتە ەسىنەن اداسقان كۇيدە بولعانىن العا تارتتى.

سوتتا پروكۋرورلار وعان 30 جىل باس بوستاندىعىنان ايىرۋ جازاسىن سۇرادى. ولار ايىپتالۋشىنىڭ جاۋاپكەرشىلىكتەن جالتارۋعا تىرىسقانىن, ءوز ارەكەتتەرىن ناقتى تۇسىندىرمەگەنىن ايتتى. سونداي-اق, ول مارقۇم ايەلىن كىنالاۋعا تىرىسقانىن اتاپ ءوتتى.

سوڭعى سوزىندە ايىپتالۋشى بالالارىنان جانە ايەلىنەن كەشىرىم سۇراپ, جىلاپ جىبەرىپ, «قۇدايدىڭ جازاسىنا لايىقپىن» دەدى. ۇكىم 12 ماۋسىمدا جاريالانادى دەپ جوسپارلانعان.